حوار رباعى

هى :وبعدين بقى ،انتى هتفضلى ساكته كده كتير ؟؟؟

أنا :ساكته !!أسكت على ايه بس ؟؟؟

هى: اعملى نفسك مش عارفه ،ده كل اللى عندنا ف الشغل واخدين بالهم وحاسين بكل حاجه

أنا :اتكلمى جد بقى شويه ..واخدين بالهم من ايه وحاسين بايه...؟؟!

هى :حاسين بيكى انتى وايهاب انتى مش واخده بالك من نفسك ولا ايه

أنا : أنا وايهاب ..؟؟!!ليه ؟؟؟

هى :يا حبيبتى ..ده انتوا مجرد ما بتتقابلوا ولو صدفه ...مبتشوفيش نفسك ...بتتسمرى وبتقفى ف مكانك ومبتتحركيش غير لما حد ينبهك

أنا :يا نهار ابيض عليكى ...وبعدين معاكى بقى ...نظرات اي وبتاع ايه ...لا لا لا لا انا مليش ف الحاجات دى خالص ...ومتصدقيش اى حد يقوللك الى حاجه

هى : والله انا مش بصدق حد ...انا بصدق نظرات عيونك ليه ولهفتك عليه ولهفته هو كمان عليكى

أنا : انتى بتقولى ايه ، لا لا لا مش ممكن طبعا

هى :يعنى ايه انتى بتنكرى اعجابك بيه ؟؟!!

أنا :انا منكرش انى معجبه بيه (بس اعجاب بس ومتخليش فكرك يروح لبعيد

) هى :ماشى هنخليها اعجاب ...بس _بفضول _ ايه اكتر حاجه شدتك ليه ..ها ...ايه ؟؟؟

أنا : (ف لحظة سرحان )- يعنى ...ادبه ،اخلاقه ،علمه ...بصراحة هو نموذج كامل للراجل الجنتل مان

هى :امممممم..._بخبث_طب وهو أول درجات الحب ايه ..؟؟؟

أنا : $$$تقصدى ايه ؟؟؟

هى :ممكن تردى على سؤالى ...اول درجات الحب ايه ؟؟؟؟

أنا :معرفش متهيالى الاعجاب

... هى :مش متهيألك ...ده أكيد

أنا :طيب خلاص ...اديكى عرفتى ...ارتحتى ...عايزة منى حاجه بقى ..؟؟!!

هى :اه ...عايزاكى تقربى منه اكتر من كده ..._بخبث واضح _خصوصا انه هو كمان بيحبك

انا :_بالهام _يا رييييت ، احم ...مين اللى قاللك كده ؟؟؟

هى :يا حبيبتى الحب مش محتاج حد يقول للتانى ،الحب بيبان من نظرته ليكى من اهتمامه بيكى

ومن لهفته عليكى

أنا : ايوة ....بس انا مش عايزة احول اعجابى ده لحب وف الاخر اخسرة كزميل

هى : ومين قاللك انه زميل ...وهو ف زميل بيكون مهتم بزميلته كده

أنا : متلعبيليش ف دماغى بقى ...عايزانى اعمل ايه يعنى ؟؟؟

هى : بصى له ك حبيب ...مش يمكن لما يلاقى منك امل ف تغيير اوضاعك يتحرك هو كمان ويعمل

الاكشن اللى احنا مستنينها

أنا :اكشن ايه انتى كمان ...

هى :الاكشن اللى انا وانتى بنحلم بيها ... أنا : تقصدى ايه ؟؟؟

!!! هى : اعملى نفسك مش عارفه ...انه ييجى يكلم بابا

...

أنا : يكلم بابا ...تفتكرى ...

هى :ايوة طبعا افتكر ...جربى انتى بس وانتى تدعيلى

... على الناحية الثانية

هو : اسمع كلامى ومش هتندم

.. ايهاب : اسمع كلامك على ايه انت كمان

...!! هو : متنكرش بقى ...انا عارفك كويس

... ايهاب :عارف ايه بس ...طب افرض هى مش معجبه بيا اخسرها كزميلة ليه ؟؟؟

هو : وان كانت بتحبك تخسرها كحبيبة ليه ...؟؟

ايهاب : انت هتحيرنى معاك ليه ؟؟

هو : ولا حيرة ولا حاجه ...الموضوع باين من اوله انت من جواك تحب تحتفظ بيها فقط كزميلة ولا

تحب انها تكون شريكتك ف حياتك وتكون مراتك ام اولادك

ايهاب : انا منكرش انى بحلم باليوم ده ...بس انا ايه ف ايدى اعمله ؟؟!!

هو : انت ف ايدك حاجات كتير اوى ...كفايه يا اخى انك انت الراجل والحركة المفروض تكون

منك انت

... ايهاب : بس

،،،,,,... هو : اسكت بقى انت لسه هتقول لى بس ..يا اخى ركز ف نظراتها ليك ،ده اللى مياخدش باله

منكم وانتوا بس بتبصوا لبعض يبقى لا مؤاخذة مغفل

ايهاب : طب وايه لزومه بقى الطريقه دى يعنى ؟؟؟!!

هو : تعبتنى معاك بقوللك بتحبك بتحبك والله العظيم بتحبك ...افهم بقى

ايهاب :يعنى تفتكر بجد !!

هو : استغفر الله العظيم _يصطنع البرود _ مش افتكر وبس ..ده اكيد وبعدين انت هتفضل تقوللى

تفتكر تفتكر لحد ما هييجى حد تانى يخطفها منك _ب لؤم_

ايهاب : يخطفها !!!! ....يا ساتر بس متقولش ف وشى انت مش متخيل انا بحبها قد ايه

هو : طيب صدقتنى انك بتحبها

ايهاب : انا فعلا بحبها ومن بكرة هتقدم لباباها ...

............

فى الشركة

هى :ايهاب انا كنت عايز اقوللك

... هو : _قاطعها _اميرة انا كنت عايز اقوللك

.. هى : ها قول (بلهفه

)

هو :عايز اقوللك انى مش قادر اعيش من غيرك -عايز اقوللك انك احلى حاجه حصلت لى ف دنيتى -عايز اقوللك تقبلى تتجوزينى ؟؟؟؟!!!!!؟؟

!! من وراء الستار : وهى : متهيألى احنا كده عملنا اللى علينا ووفقنا الراسين ف الحلال

:):):)

طبعا فى بداية كلامى أود ان اعتذر كثيرا عن غيابى لهذه الفترة ليست بالقصيرة عن مدونتى

ولكنها دوما بوجودكم متالقة

طبعا انتوا عارفين كويس أوى قد إيه انا بحب أم كلثوم وعبد الحليم وكل عمالقة الزمن الجميل

علشان كده انا عملت لهم جروب على الفيس بوك

وأرغب منكم أن تجعلوا جروبى منور بكم كما هو حال المدونة

وهذا هو عنوانها

لعشاق زمن الفن الجميل

هستناكم هناك

مـــــــــــــن أنـــــــــــــا

من أنا ؟؟؟؟

أنا شخص مفرط الحساسية ...يمكن

أنا شخص بحب الناس كلها ....أكيد

أنا شخص طيب أوى وعلى نياتى ....طبعا

أنا شخص بيضحك عليه كتير ....مش عارفه

فى الواقع كل هذه التعريفات تقترب من المثالية ولا تليق بى ولكن ،،

أنا بنوتة نفسها تنول رضا أبوها وأمها بأى طريقه ،

أنا بنوتة عايزة تنول أعلى المراكز العلمية لتحقيق حلمها وليفخر بها أبواها ،

أنا عاشقه قديمة ل أم كلثوم وعبد الحليم ونجاة و وردة و فايزة ،

أنا انسانة حساسة جدا جدا لأقل حاجه ممكن تتقال حتى ولو كانت هزار ،

أنا طيبه جدا لأبعد الحدود علشان كده بصدق كل اللى حواليا ،

أنا بمجرد اقترابى من أى فتاه اعتبرها على الفور صديقه لى وفى النهايه انكسر وانخدع بسببها ،

أنا انسانه فقدت الثقه بوجود اصدقاء حقيقين لانصدامها بمن كانوا اصدقائها ،

أنا انسانه ابتعد عنى (اصدقائى) لكثرة اهتمامى بهم ،

أنا انظر إلى نفسى كثيرا فى المرآه ولا أصدق ما يقال عنى ،

أنا أنظر لمن حولى فلا أجد من تشاطرنى عن حق فرحى وحزنى وألمى

أنا ....أنا مش عارفه أنا إيه ؟؟؟؟؟

الـــــــــــــــــعـــــــــــــــــــــــنــــــــــــــــــــــدلـــــــــــــــــيـــــــــــب

فى ذكرى وفاة العندليب عبد الحليم حافظ ..... لا يسعنى سوى ان أتذكر اغانيه الرائعه واحساسه المرهف العالى الذى جذبنى اليه وجعلنى لاغانيه من المدمنين

الفنان الراقى .....الحاضر الغائب ....الذى كون كل نجاحاته من معاناته

فقد ولد ولم تضمه امه فى حضنها ابدا ولم يذق طعم حنان الأب

تشكلت شخصيته من الحرمان والقسوة والمعاناه واليتم لنرى فنان من النادر تواجده مرة اخرى ... ليس من النادر لكن من المستحيل

عبد الحليم الحافظ .... الفنان المبدع ....غبت عنا ولكن أغانيك معنا أينما ذهبنا

فعندما نريد الفرح ....نراك بجانبنا

والحب ...

الالم

الجرح

العتاب

الشكوى .............................

لم يحترف الفن والغناء لمجرد الغناء والتواجد على الساحة الفينه انما احترفهما لرغبته فى التعبير عن مشاعر الاخرين

والغوص معنا فى كل ما يواجهنا ليطربنا بصوته ونعيش معه فى اغانيه التى ابدا لا نمل ولا نكل من الاستماع لها

فى ذكرى وفاتك يا عندليب وبعد مرور 33 عاما على غيابك ..... لا يسعنى سوى القول : رحمه الله عليك يا عندليب ..رحمه الله عليك

بين بين

لطالما عشقت طه حسين حتى بدون أن أقرأ له ...وبدون أن اتمعن فى كلماته الجميلة التى ما اذا قرأتها دخلت فى عالم آخر ولا تخرج منه إلا عندما تنتهى من قراءة من تقرأه ....استمتعوا معى بهذه القطعة الفريدة التى وجدتها بمحض الصدفة ....

(اُنظُر يا سَيِّدي إِلى يَمينٍ ؛ فَخُذْ بِحَظِّكَ مِنَ الْحُزْنِ ، وَانْظُرْ إِلى شِمالٍ ؛ فَخُذْ بِحَظِّكَ مِنَ السُّرورِ ؛ فَلا خَيْرَ في الْحَياةِ إِذا لَمْ تَكُنْ حُزْنًا وَسُرورًا ، وَلَذَّةً وَأَلَمًا ، وَجِدًّا وَلَهْوًا . اُنـــْظُرْ عَنْ يَمينٍ ، وَانْظُرْ عَنْ شِمالٍ ، ثُمَّ انْظُرْ أَمامَكَ إِلى هذا الْبَلَدِ الْحَزينِ التَّعِسِ ، الَّذي يَعْدو عَلى حُقوقِهِ أَصْحابُ الْجِدِّ ، وَيَلْهـو بِمَنافِعِهِ أَصْحابُ اللَّهْوِ، وَهُوَ يَحْتَمِلُ عُدْوانَ أولئِكَ ، وَيَحْتَمِلُ لَهْوَ هؤُلاءِ ، مَحْزونًا حينًا ، مَسْرورًا حينًا آخَرَ ، ساخِرًا مِنْ أولئِكَ وَهؤُلاءِ دائِمًا ، لِأَنَّهُ قَدْ بَلا مِنَ الدَّهْرِ خَيْرَهُ وَشَرَّهُ ، وَذاقَ مِنَ الْأَيّامِ حُلْوَها وَمُرَّها ، وَوَثِقَ بِأَنَّ عَدْلَ اللهِ قَريبٌ ، وَبِأَنَّ الْحَقَّ مُنْتَصِرٌ ، مَهْمَا يَتَّصِلْ سُلْطانُ الْباطِلِ ، وَبِأَنَّ صَرْحَ الْجَوْرِ مُنْدَكٌّ ، مَهْما يُشَيَّدْ بِأَضْخَمِ الْأَحْجارِ وَأَصْلَبِ الصُّخورِ ) طه حسين:

بَيْنَ بَيْنَ"، الطبعة الثانية عشرة سنة 1983م، نشرة دار العلم للملايين ببيروت، ص14

هو وهى

قال هو : مش عايزة منى حاجة تانية

قالت : لأ.... أه ...قول له انه وحشنى ..قول له إنى غلطانة ..قول له كمان إنى أنا ندمانة

إحكيله ..إحكيله ازاى انا مش عارفه أعيش من غيره

_وسكتت مرغمة طبقا لأوامر الدموع التى منعتها من الكلام_

قال لها _بأسف_ : حاضر ..حاضر هقول له بس متبكيش علشان خاطرى

قالت له : قول له هو ليه عمل كده ...ليه ؟؟؟

قول له

قال لها: متخافيش هقول له وأفكره

قالت له _ والدموع تغالبها مجددا _:اه فكره , فكره بكل حاجه

...

ومـــــــــــشــــــــــــــى

وارتمت هى على الكرسى المجاور وهى تبكى بشده ..حتى كادت ان تمتنع عن التنفس

وتذكرت ...كل شئ ...كل شئ

تذكرت التحاقها بوظيفتها الأولى بعد ان تخرجت من كليتها ،وتذكرت ايضا انه كان مديرها الشاب

وتذكرت أول لقاء له معها

وتذكرت ملاقاه عيونها معا

وتذكرت اثنائه على أى عمل تقوم به

كما تذكرت أيضا عندما فاتحها فى الموضوع

وتذكرت يوم زفافهما

و....و....و......

ولكن ..

كيف تقنع نفسها انه تذكرت انها لم تنس ابدا أى شئ يتعلق به

انها مازالت تحبه

نعم

تحبه

ولكن لماذا فعلت كل هذا ؟؟؟؟

من أجل الوظيفة

من اجل توفير مستوى معيشة أفضل

كل هذه الأسباب واهيه غير مقنعه على ما فعلته

ها هى تتذكر حوارهما

هو : انتى مش هتسيبى الشغل بقى

.. هى : ليه ؟؟

هو: ليه إيه انتى مواعدانى إن شهرك التالت مش هيعدى عليكى وانتى فى الشغل وانك هتبطلى شغل وهتتفرغى للبيبى اللى جاى

هى : بس انا مش هقدر أسيب الشغل ...الشغل ده بقى هو حياتى

هو : وانا ...وابنك اللى جاى ....ملناش اى اعتبار عندك ...؟؟؟

هى : انت مكبر الموضوع كده ليه ..كل الحكاية انى مكنتش متوقعة التقدم اللى حققته فى

الشغل وانا دلوقتى على وشك ترقيه مهمه مش عايزة أضيعها منى ..

هو : يعنى تضيعى الترقية ولا تضيعينى انا ..؟

هى : امتنعت عن الإجابة

هو : ردى عليا

هى : سؤالك ملوش إجابه عندى ..كل اللى أقدر أقوله لك ...انى مش هقدر استغنى عن شغلى

هو _بكبرياء_: صح كده ...متستغنيش عن شغلك بس استغنى عنى

وقام تاركا لها المنزل

ولم تلاحقه

وها هى تتذكر الآن

يا الله

كيف كنت بهذا الجفاء معه ،،كيف كنت معه بهذا الجحود ،،ولماذا نسيت فى لحظة حكاياته معى،،ولماذا فى لحظة أخرى ..استغنيت عن كل شئ لماذا ؟؟؟؟

يا الله كم اتمنى ان يستمع الى كلام أخى ...وأن يتذكر كل عهودنا

.. فى ناحيه أخرى

هو : وبعدين معاك بقى ؟؟؟ مش تبطل دماغك الناشفة دى

الزوج: انا دماغى مش ناشفه ..امبارح بس اكتشفت انا وسميرة ان كل واحد فينا عايش وماسك للتانى

سكينة ورا ظهره

هو : سكينة ايه بس يا عم الحاج

، انت مكبر الموضوع اوى يا عادل

عادل : لا يا أيمن انا مش مكبر حاجه ، _بأسف_ هى اللى نست كل حاجه

أيمن : طب إيه رأيك انها قالت لى انها مستعدة تسيب الشغل وانها مستعده ترجعلك تانى

عادل: بلهفة انطفأت سريعا : يااااه مش بالبساطة دى

أيمن : لا صدقنى بالبساطة دى ..يا عادل سميرة بتحبك والله

وانت عارف بس الحمل وكده وهى اكيد كانت ظروفها او حالتها النفسيه مش مساعداها

عادل: انا مش هقدر

وســــــــــــــــــــكـــــــــــوت

وتمر الأيام ، وتمضى الأسابيع ولا يتغير شيئا

وتحاول بينهما الأطراف بالصلح ولكن

... أيمن : ألو أيوه يا عادل إزيك

عادل: أهلا يا ايمن الله يسلمك

أيمن : سيب اللى فى إيديك وتعالى حالا المستشفى

عادل : ليه حصل لك حاجه؟؟؟

أيمن : لا يا بنى آدم مش أنا ،، دى سميرة

سميرة بتولد يا بنى آدم

عادل: والنبى صحيح

أيمن أومال ههزر معاك يعنى

فــــــى المســــتــــــشــــفى

سميرة: عادل ...فين عادل ...قول له ييجى

أيمن : حاضر حاضر انا كلمته وهو جاى فى السكة

سميرة: آآآآآآآآآآآآآآآآآآآآآآه

بعد الولادة

سميرة : فين إبنى؟؟

الممرضة : مبروووك يا مدام ... دى بنت مش ولد

سميرة : بنت أو ولد أنا عايزة أشوفها

وفوجئت بأن عادل هو من يقدم لها بنتها

هى : عادل ...انت هنا بجد ...و

.. هو:_وضع يده على شفتيها_ : هسسسسس متتكلميش علشان صحتك ، شوفتى بنتنا حلوة إزاى ؟؟؟

هى: ربنا يخليك ليا وميحرمنيش منك أبدا ، انت عندك حق انت وبنتى عندى اهم مليون مرة من أى وظيفه وأى ترقيه

هو: ملوش لزوم بقى الكلام ده ،،المهم انك تقومى لنا بالسلامة

هى _بنظرة حب و امتنان_: ربنا ما يحرمنى منك ابدا

أيمن: الزوجين الحلوين ياخدوا صوره مع البنوتة

..

كانت وأصبحت

دقت هى الباب بدقاتها المحببة المتراقصة

وقال هو : اتفضل ...قالت له : بابا حضرتك فاضى ...عايزة أكلمك فى موضوع مهم ...

قال لها : حبيبة قلب بابا ...نعم ..عايزة إيه ؟؟؟؟

قالت له : لو حضرتك مش فاضى ممكن أجيلك وقت تانى ..

قال لها : يا حبيبتى ده أنا لو مش فاضى أفضى نفسى مخصوص علشانك ..

فإبتسمت له الإبتسامة التى يحبها قائلة : حضرتك عايز الصراحة ..صح ؟؟؟

قال لها : وهو أنا معودك معايا على إيه ؟؟

قالت له : الوضوح والصراحة من أول كلمة ..

قال لها : طب قولى يلا عايزة إيه ؟؟

قالت له : هو الموضوع متعلق ب أ. مازن ..معيد عندى فى الجامعة..

ترك هو القلم من يده ..وخلع نظارته الطبيه من على وجهه ونظر إليها بإهتمام شديد وقال : معيد عندك فى الجامعة ؟؟!!

قالت له _بتردد_:أيوه يا بابا ..

قال لها : وماله بقى يا ستى ..؟

قالت له : هو عايز ييجى يكلم حضرتك فى موضوع كده .._ وأطرقت رأسها فى الأرض وهى تعبث بقلمه _..

قال لها_بضحته المعهودة_ :و يا ترى المعيد بتاعك ده عايز يكلمنى فى إيه ؟؟؟

قالت له _ والخجل يعلو وجهها _: وبعدين معاك بقى يا بابا ما حضرتك عارف كويس ..

قال لها : طيب حبيبة قلب بابا ممكن تدينى شوية تفاصيل صغنونة كده

قالت له_ وهى تفهم مغزى سؤاله _:حضرتك عايز تعرف إيه بالظبط ؟؟؟

قال لها_ وهو يعرف ما تعرفه_ :كل حاجه من طأطأ ل السلام عليكم ..

ضحكت هى وقالت له : بص بقى يا سيدى ..أ.مازن وهو معيد عندى فى الجامعة وخلص تمهيدى الماجيستير و...و......

قال لها : ايه ده كله ..ايده ده كله ..حيلك حيلك ..براحة عليا شوية ..انتى قولتيلى هو معيد ؟؟!!

قالت له : آه يا بابا ..

قال لها : طيب يا بختك يا عم ..

قالت له _بضحكة يكسوها الخجل _ :حضرتك مش هتبطل هزار وتسمعنى بقى للآخر ولا أقوم أمشى ؟!!؟؟

قال لها _ وهو سعيد لإنفراج أساريرها وبدئها بالحديث _: حاضر يا ستى هبطل هزار اتفضلى كملى كلامك ..

قالت له : معرفش عنه كتير هو انا حضرت له صدفة كام سكشن كده وبعدها لقيته بيفاتحنى فى الموضوع

قال لها _ بضحكة_ على طول بعد كام سكشن ولا كان فى حاجه تانيه ...

قالت له : وبعدين معاك بقى شكلك عايزننى أقوم ..

قال لها : طب معلش إحكيلى انتى بالتفاصيل المملة وأنا مش هضايقك تانى ..

قالت له : حاضر .. أنا زى ما قلت لحضرتك فى الأول ..أنا حضرت له كام سكشن كده ..وبعدين لقيت شرحه حلو أوى أوى وتحس كده أنه واثق من نفسه ومن اللى هو بيقوله .وبعدين هو كان من أول السكشن مهتم بيا أنا . قصدى بكل الطلبة ..بس كان مركز عليا أنا شوية وبعد السكشن قال لى : أنا المكتب بتاعى فى آخر الكوريدور لو إحتاجتى أى إعادة للشرح ..ف أنا اتفاجأت من الكلام بتاعه وقلت له : حاضر إن شاء الله ..

وبعدها بإسبوع لقيته فى ميعاد السكشن التانى وبعد ما خلص الشرح وكالعادة كان التركيز عليا أنا ..قال لى : إنتى مجيتيش ليه المرة اللى فاتت .. ،، قلت له :هو مش حضرتك قلت لى :لو إحتاجتى حاجه إبقى قوليلى ..قال لى : أيوة طبعا ..قلت له : ميرسى جدا جدا لذوق حضرتك بس أنا ماحتاجتش حاجه ..عن اذنك ومشيت ..

قال الأب : يا واد إنت يا تقيل ...

قالت له : وبعدين ماك بقى يا بابا .

قال لها :خلاص خلاص...... كملى

قالت له : بعدها كذا مرة كان بيحاول يكلمنى وكانت النتيجه انى انقطعت عن حضور السكشن بتاعه ...

وكمان اسبوعين لقيته بيكلمنى على الموبايل ..

قال لها الأب : إزاى يعنى ...وهو كان جاب نمرة الموبايل بتاعك منين ؟؟؟

قالت له : ما هو ده اللى أنا كنت بحاول أعرفه الفترة اللى فاتت ...

قال لها : ووصلتى لنتيجة ...

قالت له : أيوة وقاطعت البنت اللى عملت كده ...

قال لها : لا متقاطعيهاش حرام دى مهما كان كانت بتحاول توصل بينكم ومتعمليش اى حاجه تندمى عليها ..وهقوللك ليه بعدين ..بس ده مش موضوعنا دلوقتى ...

وبعدين ؟؟؟

قالت له : لما كلمنى أنا أتفاجأت طبعا وقلت له : حضرتك جبت النمرة دى منين ...؟؟..وإزاى حضرتك تكلمنى على الموبايل ؟؟!!!!!

وقال لى : براحه بس يا آنسه نورا ,,أنا غرضى شريف والله أنا عارف الأصول كويس وملقيتش أى طريقة أوصل لك بيها غير التليفون لإننك قطعتى حضور السكاشن من فترة ومش عارف أشوفك ..

قلت له : طب وحضرتك عايز إيه دلوقتى ؟؟؟

قال لى : أنا مش وحش ..لإننى لو كنت وحش مكنتش طلبت منك الطلب ده ..

وتغيرت ملامح وجه أبيها إالى الدهشة الشديدة واسترد هى سرد الأحداث ....

قلت له : طلب إيه ؟؟؟ ..

قال لى : أنا عايز ميعاد من السيد الوالد أو على الأقل نمرة التليفون لإننى عايز أتقدم وأطلب إيديك ..

اندهشت وفضلت لفترة ساكتة ومش عارفة أقول له إيه ...وقلت له بسرعة : 12345678

وقفلت السكة ...وجيت أحكيلك اللى حصل

بابا ...هو أنا كده غلطانة

تناول هو كوب الشاى ورشف منه رشفتان

وقال لها : عاجبك كده أهو الشاى برد

وضحكت هى بجلجله وكما لو أن هما وراح من على قلبها ..

قالت له : بجد يا بابا أنا كده غلطانة

قال لها : إنتى حاسسه بإيه ؟؟؟؟

قالت له : حاسسه إننى مبسوطة أوى أوى ...بس مش بايخة موضوع إننى قفلت السكة فى وشه

قال لها _ والضحك يغالبه_:هى بصراحة بايخة

هههههههههههههههههههههههههههههههههههه

وقام واحتضنها وضحكوا معا ....وقال لها : طب يلا قومى واحكى لماما الكلام ده وشوفى رأيها إيه ؟؟

قالت له _بضحك_ صحى النوم يا سى بابا ده أنا قايله لماما الموضوع ده من بدرى أوووووووى

قال لها : نعم ...كده بر ضه ...يعنى أنا آخر من يعلم .

ونظر لها نظرة طويلة سرح فيها وفاق على صوتها :بابا ...إنت كويس ...حضرتك كنت سرحان فى إيه ؟؟؟

قال لها : بقى حد يصدق إن بنوتتى الحلوة اللى كانت لسه نونه إمبارح كبرت وخلاص بقت آنسه جميلة وعروسة زى القمر .

أطرقت هى رأسها خجلا فى الأرض وقالت : إبقى استنى منه تليفون بقى ..

وخرجت هى من الغرفة وجلس يستعيد بعض الأحداث وجمل أبنته وما حدث معها الذى يشبه كثير ما حدث مع أمها ومعه

وخرج من الغرفة وقالت له زوجته : ها ...الولد كلمك ؟؟؟

قال لها : آه كلمنى ...ده طلع ولد مؤدب جدا وأعتذر لى بشدة على إنه اتصرف التصرف ده ..

قالت له : تصرف إيه ؟؟؟

قال لها : على أساس إنه أخد نمرة الموبايل بتاع نورا ..

قالت له: آه

وقال : وأخد منى ميعاد كمان بكرة فى المكتب ..بس انتى مش تقوليلى إن البنت حكت لك ..

قالت له : ماهى دى كانت رغبتها هى ...هى كانت عايزاك تسمع الحكاية لأول مرة منها هى ...

قال لها : طيب وإيه رأيك فى حكايتها ..

قالت له : شبه حكايتنا أوى يا هاشم ...

ونظرا لبعض طويلا ...وقالا معا فى نفس واحد ..: بنتنا كبرت خلاص وبقت عروسة ..