26‏/09‏/2009

الروتين

النهاردة صحيت من النوم .... لا لا ! ايه ده؟! ده انا منمتش اصلا!!
المهم قلت اعمل ايه اعمل ايه؟
بس اروح ادفع مصاريف السنه الجديدة فى الجامعه
ويا ريتنى ما روحت
ساعتها بس صدقت كل كلمه بتتقال عن الروتين الحكومى
منهم لله ,
فى الاول قلت علشان ابقى فى السليم اتصل بالتليفون الاول اسال اذا كان ممكن اجى ادفع المصاريف النهاردة ولا لأ؟؟
فردت عليا موظفه قالتلى: تعالى يا حبيبتى تعالى
قلت لها: حضرتك متأكده اننى ممكن اجى النهاردة ادفع مصاريف الفرقه التانيه انتظام؟!
قالت لى طبعا يا حبيبتى طبعا
قلت انا: خلاص ...طالما بتقولها بقلب جامد اوى كده اروح واخلص نفسى لاننى لو روحت فى ايام الدراسة مش هعرف اقف فى الطابور اصلا
وبعدين اول لما روحت سالت فى شئون الطلبه قاللى :لا الدفع مع السنه الجديدة !!!
قلت له: نعم !!!!!!!!!
حاولت طبعا ان اهدئ اعصابى
وقلت له اللى حصل كذا وكذا وكذا _وحكيت له عن المكالمه التليفونيه .
قاللى من اللى رد عليكى ... اللى ردت عليكى دى قالت لك المعلومات غلط
قلت له ازاى يعنى ؟؟!!؟
لاحظ انى مش هعدى الموضوع بالساهل
نادى هو على الموظف زميله وقاللى ثانيه واحده
وكان رجلا كبير فى السن واستسمحت وجهه وقلت هو ده اللى هيحل المشكله
فى هذه الثانيه وقفت انا اراجع مع نفسى الموقف
وقت فى نفسى:ايه الهزار ده ،هى دى مش كليه وكلهم المفروض متماسكين مع بعض كأعضاء هيئه شئون الطلبه
يعنى المفروض انها تعتبر منظمة ومش لازم يبقى فى اختلاف فى البيانات علشان تمشى المنظمة بسهوله وحتى لا تتعرض الى اى اختلالات_ده بحسب مجال دراستى فى ادارة الاعمال.
المهم جاء الموظف الاخر وقاللى ايه المشكله بقى ؟
تانى !!قلت فى نفسى !!هحكى تانى !
المهم قلت له على الموضوع
قاللى انتى بقى عامله مشكله علشان تدفعى
قلت له :ايوة
قال لى: يا سلاااام ولا يهمك
واستدرك :كويس انك جيتى هنا الاول لانك لو كنتى روحتى على الخزنه على طول
قاطعته وقلتله:خزنه ايه ؟؟
قال لى: الخزنة اللى جانبينا
وشاور على الخزنة....
وجدت طابورا اطول بكثييييييييييير من طابور العيش الذى اراه من وقت لآخر
لاحظ هو اندهاشى العجيب للطلبه اللى واقفين
قاللى اهو انتى كنتى هتقفى الطابور ده كله من غير اى لازمه
قلت له:كتر خيرك يا حج _نظرا لكبر سنه_
واعطانى ما يسمى بإذن الدفع
وذهبت الى الخزنة ولحسن حظى واضح ان الطلبه اللى كانوا واقفين زهقوا او طلعت روحهم او اتخنقوا او....او.....
ووجدت الخزنه فارغه تماما ودخلت بسرعه ودفعت ولم اصدق نفسى انى دفعت واخدت الايصال
قلت بالمرة بقى اسال عن الجدول فقلت لها:لو سمحتى ؟؟؟
قالت لى: نعم؟؟؟
قلت لها:الجدول
قالت:بكرة
قلت لها:الكتب
قالت:بكرة
قلت لها:الكارنيه
قالت:بكرة
قلت لها: شكرا
اعتقدت انها هتقوللى بكرة
ولكن الحمد لله غيرت الكلمه وقالت :العفو
وقتها تذكرت الراحل عماد حمدى عندما قالها فى فيلمه ام العروسة:
الله يخرب بيت الروتين على اللى ابتدعوا الروتين

20‏/09‏/2009

العيد فرحة

اهو جانا العيد اهو جانا العيد زئططوا يا ولاد ..افرحوا يا بنات يا ليلة العيد انستينا وجددت الامل فينا ...يا ليلة العيد والاغانى اللى بتعبر عن فرحة العيد كتير لكن شددتنى منهم اغنيه السيدة ام كلثوم والاغانى الجميلة اللى بتغنيها صفاء ابو السعود كل سنة وكل زوار المدونة بخير وصحة وسلام طبعا العيد السنة دى كان ليه طعم جديد تماما اول مرة ييجى العيد فى الاجازة والعيد السنة دى جاى ف وسط توضيب الشقة بس صدقونى المختلف هو احساسى بالعيد حاساه السنه دى مختلف لما نزلت اصلى العيد كان احساس شديد بالفرحة اثناء ذهابى للمسجد زحمة كتيييييييييييييييييييييييييييييييييييييييييييييييييييييييييييييييير ومع المساحة الصغيرة المخصصة للسيدات والزنقه احسست انى اقف وحدى اثناء بدء الصلاه يعنى فى احتمال اسافر اروح اسكندرية محتاجه مناظر الخضرة والبحر قبل بدء السنه الدراسية الجديدة كل سنة وانتوا طيبين وعيد سعيد علينا وعليكم كلكم