26‏/09‏/2009

الروتين

النهاردة صحيت من النوم .... لا لا ! ايه ده؟! ده انا منمتش اصلا!!
المهم قلت اعمل ايه اعمل ايه؟
بس اروح ادفع مصاريف السنه الجديدة فى الجامعه
ويا ريتنى ما روحت
ساعتها بس صدقت كل كلمه بتتقال عن الروتين الحكومى
منهم لله ,
فى الاول قلت علشان ابقى فى السليم اتصل بالتليفون الاول اسال اذا كان ممكن اجى ادفع المصاريف النهاردة ولا لأ؟؟
فردت عليا موظفه قالتلى: تعالى يا حبيبتى تعالى
قلت لها: حضرتك متأكده اننى ممكن اجى النهاردة ادفع مصاريف الفرقه التانيه انتظام؟!
قالت لى طبعا يا حبيبتى طبعا
قلت انا: خلاص ...طالما بتقولها بقلب جامد اوى كده اروح واخلص نفسى لاننى لو روحت فى ايام الدراسة مش هعرف اقف فى الطابور اصلا
وبعدين اول لما روحت سالت فى شئون الطلبه قاللى :لا الدفع مع السنه الجديدة !!!
قلت له: نعم !!!!!!!!!
حاولت طبعا ان اهدئ اعصابى
وقلت له اللى حصل كذا وكذا وكذا _وحكيت له عن المكالمه التليفونيه .
قاللى من اللى رد عليكى ... اللى ردت عليكى دى قالت لك المعلومات غلط
قلت له ازاى يعنى ؟؟!!؟
لاحظ انى مش هعدى الموضوع بالساهل
نادى هو على الموظف زميله وقاللى ثانيه واحده
وكان رجلا كبير فى السن واستسمحت وجهه وقلت هو ده اللى هيحل المشكله
فى هذه الثانيه وقفت انا اراجع مع نفسى الموقف
وقت فى نفسى:ايه الهزار ده ،هى دى مش كليه وكلهم المفروض متماسكين مع بعض كأعضاء هيئه شئون الطلبه
يعنى المفروض انها تعتبر منظمة ومش لازم يبقى فى اختلاف فى البيانات علشان تمشى المنظمة بسهوله وحتى لا تتعرض الى اى اختلالات_ده بحسب مجال دراستى فى ادارة الاعمال.
المهم جاء الموظف الاخر وقاللى ايه المشكله بقى ؟
تانى !!قلت فى نفسى !!هحكى تانى !
المهم قلت له على الموضوع
قاللى انتى بقى عامله مشكله علشان تدفعى
قلت له :ايوة
قال لى: يا سلاااام ولا يهمك
واستدرك :كويس انك جيتى هنا الاول لانك لو كنتى روحتى على الخزنه على طول
قاطعته وقلتله:خزنه ايه ؟؟
قال لى: الخزنة اللى جانبينا
وشاور على الخزنة....
وجدت طابورا اطول بكثييييييييييير من طابور العيش الذى اراه من وقت لآخر
لاحظ هو اندهاشى العجيب للطلبه اللى واقفين
قاللى اهو انتى كنتى هتقفى الطابور ده كله من غير اى لازمه
قلت له:كتر خيرك يا حج _نظرا لكبر سنه_
واعطانى ما يسمى بإذن الدفع
وذهبت الى الخزنة ولحسن حظى واضح ان الطلبه اللى كانوا واقفين زهقوا او طلعت روحهم او اتخنقوا او....او.....
ووجدت الخزنه فارغه تماما ودخلت بسرعه ودفعت ولم اصدق نفسى انى دفعت واخدت الايصال
قلت بالمرة بقى اسال عن الجدول فقلت لها:لو سمحتى ؟؟؟
قالت لى: نعم؟؟؟
قلت لها:الجدول
قالت:بكرة
قلت لها:الكتب
قالت:بكرة
قلت لها:الكارنيه
قالت:بكرة
قلت لها: شكرا
اعتقدت انها هتقوللى بكرة
ولكن الحمد لله غيرت الكلمه وقالت :العفو
وقتها تذكرت الراحل عماد حمدى عندما قالها فى فيلمه ام العروسة:
الله يخرب بيت الروتين على اللى ابتدعوا الروتين

هناك 11 تعليقًا:

عمرو يقول...

أهلا يا هبة
على فكرة دي بداية الروتين.. الأيام اللي جاية هاتكتشفي إن ما حدش في الموظفين عارف حاجة وإنهم بيعقدوا المواضيع عشان خايفين من المسئولية
أنا مشفق عليكي بصراحة.. بس لازم تشوفي من اللي احنا شوفناه
:)

Mahy يقول...

صباح الخير عليكم انا اول من يعلق الحمد لله بس المصاريف بتاعت الجامعه الوقوف عليها بالتوابير يلا كله علشان ننجح

Heba Taher يقول...

رجعتيني لذكريات كانت من 13 سنة فاتوا
يا هبهوب ده كان حالنا دايما في الجامعة
على فكرة
تصدقي اني لسة ماشية بالشهادة المؤقتة
وماستخرجتش الشهادة الكبيرة (زي ما يبيقولوا عليها) عشان خاطر الروتيننننات اللي هتتفرض علي عشان اطلعها
قلت يالا
لما احتاجها أبقة ازنق نفسي واعصر على نفسي كيلو لمون واطلعها
الدراسة قربت أوييي وفجأة لقيتها جت تاني بسرعة
ربنا يلطف على عيالنا بس ويحفظهم في المدرسة والفصل والباص وكل الأماكن اللي هيبقى فيها زحام وزنقة دي
كل سنة دراسية وأنتي طيبة يا حبيبتي

Heba Gamal Emara يقول...

اهلا بيك يا استاذ عمرو
ربنا يخليك والله
بس هو علشان حضرتك شوفت تعقيد لازم انا كمان اشوفه !!!!!!!!!!!
:):):):)

Heba Gamal Emara يقول...

ازيك يا ماهى
لا والله ده مش اول تعليق
بس معلش
كانه كان
المهم يا ريت يا مها لو الواحد عارف انه بالمصاريف ينجح كنا دفعناها اضعاف اضعاف :)

Heba Gamal Emara يقول...

مدام هبه
:):):)

جمال عمارة يقول...

هبهوب..

ما شاء الله.. ما شاء الله..

يعني أغيب عن مدونتك يومين آجي ألاقي كل المقالات دي؟؟

علشان كده كل شوية تاخدي المودم وألاحظ إنه "بيتشفط"..

بس مش مهم.. خليه يتشفط طالما ها تطلعي لنا حاجات جديدة..

تعرفي يا ببس.. التدوينة دي أحسن تدوينة كتبتيها.. عارفة ليه، لأنها عن خبرة مررت بيها، يعني هي تدوينة "أصيلة" genuine.. :)

يعني ها تتبدي تبقي زي الأدباء المحترمين، يمروا بخبرات مؤلمة في الحياة، وهذه الخبرات مؤلمة في الحياة تثري مشاعرهم وأفكارهم، وهم يطلعوها على قرائهم.. :)

ما شاء الله يا بيبي.. مدونة جميلة وابتدت تستوي..

Heba Gamal Emara يقول...

ربنا يخليك ليا يا بابى
كتر الله خيرك
وجزاك الله كل الخير
يا رب يا بابى كل دعواتك تتحقق
:)
بس متهيالى المدونه لسه عايزة تتحط فى الفرن وتاخد( وش ) :):)

ponpona يقول...

يابسبوسه هو دا الطبيعي فاماتندهشيش
وبعدين أنا ليه أريحك لما ممكن أوي أتعبك

بصي ... انتي تعملي كده
طالما رايحه تخلصي ورق حكومه يبقي القاعده انك ممكن تروحي وتيجي وانتي ما أنجزتيش حاجه والاكسبشن انك فعلا تخلصيه ساعتها بقي اندهشي


عاااادي جدا
احنا عندنا ف الكليه بيفتحو باب دفع المصروفات للمغتربين قبل الدراسه باسبوع واحد وتلاقي طبور طويييييييييل للـ6 دفعات ، تخيلي الطلبه بتوع الـ6 دفعات كلهم مره واحده والمغلوبين علي أمرهم لازم يدفعو المصروفات قبل الدراسه عشان يخلصو ورق السكن ف المدينه ، وبيجو يقفو ف الطابور يوم واتنين وتلاته لأن الخزنه بتقفل في مواعيد العمل الرسميه ، وعادي جدا بردو
يعني تسافري بالساعات كل يوم عشان تقفي ف طابور وكمان ممكن أوي ماتخلصيش حاجتك

هبه ... ماتندهشيش
:)

Heba Gamal Emara يقول...

طيب تفتكرى ليه كده بيحصل يا بنبونة
ايه البواخة دى ....ايه الرخامه دى
لا حول الله يا ربى
ربنا يهدى اللى فى بالى
منعا للدخول فى المشاكل السياسية :)

علياء يقول...

فعلاً يا هبة.. جميل إنك تعرضي تجربة مررت بيها,, وعلى رأي زهرة "يبقى انتي أكيد في مصر" :)
بس موضوع مكتوب بطريقة جميلة, والأجمل نهايته بجملة عماد حمدي :)
إلى الامام دوماً إن شاء الله, وربنا يكفينا شر الروتين المصري :)