02‏/11‏/2009

رخصة القيادة وحكايتى مع السواقة

فى البداية طبعا انا عايزة اعتذر _وبشدة_ عن انقطاعى عن التدوين لهذه الفترة الطويلة من الوقت وذلك لظروف خارجه عن ارادتى فمنها ظروف كانت بسبب الدراسة فى الكليه وظروف تانيه بسبب توضيب الشقه وظروف تانيه علشان كنت بصراحة بفكر فى حاجه اكتبها:) ندخل بقى فى الموضوع من زماااااااااااااااااااااااااااااااان وانا صغنونة كنت بحلم انى اسوق عربيه وكنت بشوف بابا وهو بيسوق واتخيل نفسى مكانه اول عربيه انا وعيت عليها كانت عربيه ميتسوبيشى لانسر _وصورتها موجودة فوق_ بعد كده بصراحة مش فاكرة بس اللى فاكراه كمان ان كان فى عربيه نيسان والعربيه دى بجد انا كنت بعشقها بعد كده بقى كان فى العربيه اللى بجد بجد كان هيجيلى انهيار عصبى لما كانت هتتباع وهى الكيا كانرفال وبرضه هتلاقوا صورة ليها فوق جت بعد كده عربيه البهدله والمشاوير والمدارس ..الخ الخ حماله الآسيه 128 دى تعبت معانا تعب واحنا تعبنا معاها تعب برضه _لاحظوا معايا انا انا فى كل الحلات اللى فاتت كنت مجرد راكبه_ انما بقى لما جت ال128 انتقل دورى الى ان اكون سائقه اول عربيه تعلمت عليها السواقه وركبت فيها فى مكان كرسى السائق كان معايا عمى _الله يمسيه بالخير_هو اللى اسس فيا مبادئ السواقة اول مره تعلمت فيها كانت بجانب دار الشهيد الرئيس الراحل (انور السادات) ده انا عملت يومها عمايل بهدلت الدنيا كنت_ولازلت_ بحب السواقه جدا جدا الى ان جاء اليوم المشئوم عملت حادثة بس الحمد لله مكانش فى اى خسائر للأرواح كان فى تحدى بينى وبين عمى انى هدخل المنشيه بالعربيه _ولاحظوا معايا انى انا كنت لسه فى بدايه تعليمى _ وكنت ماشيه فى امان الله الى ان فاجأنى سائق تاكسى كسر عليا فجأه وكلمه كسر عليا _لمن لا يعرفون _هى كلمة مشهورة جدا جدا فى عالم القيادة واسال عليها اى حد بيسوق المهم لقيته فجأة بيكسر عليا وسمعت عمى بيقوللى:فرملى فرملى حاسبى التاكسى ده طااااااااااااااااااااااااااااااااااااخ ده صوت الخبطة الافندى مجرد ما لقى حد بيشاور له يقف له على طول من غير ما ياخد باله بس احسن كان جزاءه انه انا خبطت له الفانوس اللى ورا كسرته وهو نتيجه الوقوف فجاة الفانوس اللى ادام عنده ادشدش نتيجه ارتطامه بميكروباص طبعا سائق الميروباص لما لقى ان الفانوس بتاعه سليم كبر دماغه ومشى وفضلت انا وعمى مع سائق التاكسى عمى قاللى لو كان مشافكيش وانتى بتسوقى انا كنت بهدلته لانه هو اللى غلطان بس انتى مش معاكى رخصه وحصل اللى حصل يومها وزعلت جدا وانقطعت لفتره طويله عن القيادة وتوالت على الاحداث الى ان وجد لى ابى مكتبا لتعليم قيادة السيارات قرب منزلنا وقاللى:روحى كملى سواقه لحد ما ترجعى تانى زى الاول علشان تطلعى الرخصة وبالفعل ذهبت انا واخى واكملت تعليمى والمدرس مواجهش اى صعوبه معايا لانه كان واخد فكرة انى مبعرفش اسوق وكان لسه بيقوللى الاساسيات لقانى فجاءه قمت مدورة العربيه وبحرق فى البنزين وقمت طالعه بيها زى الصاروخ قاللى :اومال انتى جايه هنا ليه ده انا هاخدك على صلاح سالم على طول _وانا كده اخدت شهادة خبرة_ لان هو قاللى انتى اول واحده تيجى هنا واطلعها صلاح سالم من اول مرة وكان تعليمى هنا كان على عربيه اسمها هيونداى اكسيل _وبرضه هتلاقوا لها صورة فوق_ وجه بقى اليوم الموعود اللى انا كاتبه التدوينه دى علشانه يوم ما طلعت رخصه العربيه بعد ما تعبنا طبعا فى اننا نلاقى واسطة روحنا وقدمت للوسيط الاوراق اللازمه قاللى :استنى هنا شويه واستنيت واستنيت واستنيت ....ويلا قلت:نعم!!! قاللى يلا هتمتحنى قلت له:ازاى انا معايا عربيه اوتوماتيك قاللى مش مشكله وهنا احلفلكم يا جماعه والله والله انا معملتش حاجه غلط انا كان معايا ساعتها العربيه التى اعشقها واللى كنت حاطاها فى قائمه العربيات التى احلم بشرائها هيونداى ماتريكس جه واحد قام حاطط الاقماع_وهى حاجات كده لونها برتقالى _ومعرفش لزمتها ايه كنت متوترة جدا جدا والراجل قال لى:متخافيش هتطلعى قدام وتحودى وترجعى تانى عند العميد وانا داخله اساسا المسافه من بين عرض الاقماع اقل من عرض العربيه طبعا بعد محاولات عديده عرفت ادخل كويس جدا جدا وقاللى يلا ارجعى وانا برجع براحه براحه براحه قلت اقف امام العميد بالظبط فجأه كراااااااش ده صوت القمع اللى انا دهسته كان موجود امام العميد وانا مكنتش شايفاه قاللى :انزلى انزلى روحت للوسيط قلت له :هو ايه اللى حصل هو اللى مش ظابط القمع كويس قاللى معلش ولا يهمك قلت له بس انا معملتش حاجه غلط قاللى انتى رجعتى زياده ليه؟؟؟ قلت: انا سوقت زياده عن الامتحان يعنى المفروض ده يبقى فى صالحى قاللى تعالى بكرة وانتى تتصورى وتطلعيها وروحت تانى يوم واتصورت وطلعت الرخصة اخيرا لاننى طالما معايا الرخصة اقدر ان شاء الله بابا يشترى لى عربيه ولحد ما يشترى العربيه انا اقدر اسوق الماتريكس بس لازم بابا يبقى جانبى لحد ما يتاكد انى انا اهل للعربيه هو واثق فيا بس خايف عليا من الناس اللى فى الشارع وعايزننى فى الاول اتعود عليهم طولت عليكوا بس انا كنت عايزة احكيلكم الحكايه من اولها علشان متجوش من النص وتقولوا :تبتدى منين الحكايه؟؟؟!!

هناك 7 تعليقات:

Unknown يقول...

هههههه
الك حكايات مع السيارات
بس اكيد وان كان بعضها سيئ الا انه بيضل ذكريات حلوة

موفقه على طول هبة
ربنا يسعدك ويحققلك احلامك

ارق تحية

Heba Gamal Emara يقول...

اهلا استاذ حازم
صار لك زمان ما دخلت مدونتى
اكيد معك حق
واكرمك الله ويحقق دعواتك
:)

علياء يقول...

تدوينة جميلةفعلاً يا هبة , لأنك عشتيها بحلوها ومرها..
بس أكيد دي طبعاً كلها ذكريات جميلة:)

صحيح..مبروك الرخصة :)

وعقبال ما تكتبي لنا تدوينة عن عربيتك الجديدة إن شاء الله :)

Heba Gamal Emara يقول...

اهلا علياء ازيك
عامله ايه؟؟؟
الله يبارك فيكى يا علياء وعقبال ما تطلعى الرخصة انتى كمان
ان شاء الله يا علياء عن قريب :):):)

ponpona يقول...

طااااااااااااااخ

هي الحاجات دي اللي بتعلق مع الواحد ويفضل فاكرها طول عمره

بس خبره حلوه علي فكره
أنا أصلا شايفه ان السواقه دي حاجه غريبه قوي ، أصل ازاي الواحد مره واحده كده حدوده تكبر وتبقي زي حدود العربيه اللي هو راكبها يعني لازم يبقي عامل حساب المسافات والأبعاد بتاعة العربيه مش بتاعة جسمه .. حاجه غريبه قوي .. صح؟

سلام بقي
:))

Heba Gamal Emara يقول...

صح يا بنبونة
هى دى الحاجات اللى فعلا بتفضل مع الواحد طول عمره شوفى الحادثة دى حصلت من حوالى 4 سنين ولسه فاكراها لحد دلوقتى
بس عارفه كلهم فى البيت لحد دلوقتى مش مصدقين انى بعرف اسوق ومعايا رخصة كمان :)
حاسسين اننى انا لسه صغيرة على الموضوع ده ! :)
خصوصا وانى اول بنت فى العيله كلها تقدم على الخطوة دى !!!!
بس موضوع الابعاد ده طبعا حاجاه مهمه جدا جدا
بس متبقاش زى ما انتى فاكرة
لانى انا (واعوذ بالله من كلمه انا) :)
يعنى اخدت على الموضوع ده بسرعه
ده انا بحلم بالسواقه يا منى من وانا صغنونة :)
منورانى والله يا بنبونتى :)

Lady E يقول...

ربنا يسلم طريقك يارب

القيادة على اد ما هي حلوة انك تعتمدي على نفسك على اد ما هي خطره

ربنا يحميكي ويحفظك من كل سوء
ومبروك على رخصة القيادة