11‏/12‏/2009

قبل الندم

اكيد طبعا طبعا كل بنوتة فى الدنيا تحلم بالزواج والاستقرار النفسى والعاطفى
ولكن هل من الممكن ان تتحول الحياه الرائعه والحالمه اللى تحلم بها كل البنات اللى جحيم
هل من الممكن ان يتحول من رأيتيه شابا وزوجا صالحا الى وحش كاسر بمجرد ضمانه انك خلاص بقيتى ليه لوحده وملكيش حد غيره فى الدنيا وانك سافرتى بعيد عن اهلك وابوكى وامك ومينفعش انك تشوفيهم تانى
يبقى ده جزائها
من وثقت فيه وأحبته وأرادته زوجا لها
يكون المقابل انها تتلقى منه من انواع العذاب والهوان ما يخطر لك على بال
يكون كل اهتمامه هو ان يعف نفسه فى بلاد بعيده
كل ما كانت تريده هو لمسه حانيه على وجنتها وربته على كتفها تحسس بعدها بالامان
تتلقى بدل من هذه اللمسه ضربا مبرحا فقط لانها مزحت معه
ان يصل الامر الى ان يغلق عليها باب الشقه بالمفتاح من الخارج ....ان يحبسها
ان يصل بها الامر الى ان تتخلى عن كافه حقوقها الماديه والمعنويه فقط لمجرد الخلاص منه
واقول لها فلتحمدى ربك انك لم ترزقى منه بطفل يربطك به الى الابد ومثله لا يستحق ان يك ابا
اهذا هو الامن والامان
اهذا هو ما يطلقون عليه الاستقرار
اعلم جيدا جيدا جيدا
ان هناك اختلاف بين كل شخص واخر
وان مثل هذا الذئب هناك منه الكثيرون وهناك الكثير من الشباب من يتقون الله فى معامله زوجاتهم
وانا ادعى الله ان يرزقنى زوجا يتقي الله فينى ولا يعاملنى كرهينه مثلما عُملت المسكينه
وأثق بإذنه سبحانه وتعالى انه سوف يرزقنى به
واخيرا
عزيزتى من تفكرين بالزواج
فكرى كويس اوى اوى قبل ما يحدث ما لا يحمد عقباه
واعرفى ان لقب "عانس" احسن مليون مرة من لقب "مطلقه" او ان حتى تعيشى مقهورة ومذلوله علشان تهربى من حاجه مش موجوده اصلا

هناك 28 تعليقًا:

Maha Emara يقول...

عندك حق يا بيبى يفضل للمرأه
ان تكون عانس احسن مليون مره من ان تكون
مطلقه انها حقا مهزله حقيقيه
ولكن يجب على كل بنت
ان تفكر جيدا
:)
:)
يا رب اكون انا اول حد يعلق

Heba Gamal Emara يقول...

اهلا يا اميرة
فعلا انتى اول واحده تعلقى
شوفى يا مها
انا حتى ليه معرفش هما سموها عانس ليه ؟؟
فلا يوجد يعيب المراه انها تكون بلا زوج على ان تعيش حياتها مع وحش لا يقدر الحب والانسانيه

ميرسى على مرورك :):)

Cute Kitty **sookra يقول...

هبه العسوله
دا موش للنشر
دى صاحبتك اللى اتصلتى بيها وسامحتيها
صح؟

Heba Gamal Emara يقول...

سكرة

موش انا اللى افشى اسرار صاحبتى

انا اخدت الخيط بس
هى مستقرة الحمد لله نفسيا وعاطفيا بس هو ده اللى جه فى بالى واستعدت منه مشاكل كتيرة بتحصل لزواج الصغيرات فى السن زى حالاتى وحالات صاحبتى

مساكى حاجه مسكرة زيك يا سكرة :):)


منورانى يا سكرة

Somaya Kamal El Din يقول...

صححححححححححح

الحرية ولقب عانس مع انى مش بحبه
افضل مليون مررررررررررررررة من العذاب والذل اللى ممكن تشوفه من واحد معندوش ادنى احترام او انسانية او اخلاق

والمطلقة احسن مليون مرة من اللى تكمل مع جوزها وهو بالشكل ده

Heba Gamal Emara يقول...

استدراك لسكرة :
"واستعدت منه مشاكل كتيرة بتحصل لزواج الصغيرات فى السن زى حالاتى وحالات صاحبتى"

انا مش متزوجه ولازلت آنسه بس خوفت تفهمى الجمله غلط
هى صاحبتى بس اللى اتجوزت

انما كلمه حالاتى اللى جت فى التعليق كان قصدى بيها سنى الصغير بس مش اكتر :):)

Heba Gamal Emara يقول...

سميه

ازيك
عامله ايه
بقالى كتير مشوفتكيش عندى
ايه اخبارك
واحوالك

تعليقك جه فى الصميم

هو ده اللى انا عايزة اوصله لكل قراء المدونة واعتقد انك فهمتى وجهه نظرى بطريقه سليمه جدا جدا جدا

منورانى والله يا سميه

Cute Kitty **sookra يقول...

انتى وحشه يابت ياهبه انا قلتلك موش للنشر
وانا موش قصدت انك بتفشى اسرار صاحبتك انا قصدت انها حاله قدامك خلاتك تفكرى فى كل اللى بيتعرضوا لها
مجنونه انتى يابيبو
وبعدين انا عارفه انك صغيره وفهمت كلامك فماكانش فيه اى لزوم للاستدراك
فانا افهم جيدا

Heba Gamal Emara يقول...

سكرة
على فكرة انتى بجد منورانى جدا و انا والله بحبك اوى اوى

وميرسى لذوقك وكلامك

وكنت بنكشك بس
وبعدين يا ستى انا عارفه انك تفهمى جيدا ومخك يوزن بلد
بس غيرك ممكن يقرى وموش يفهم انا قصدى ايه ؟؟؟؟؟
ومنورانى والله كمان مرة

أميرة علي كوكب مهجور يقول...

اللي يعمل جدا كده في زوجته او في سيده عموما لا يستحق لقب رجل
رجوله حنيه واحتواء و موده و دفأ واحتضان
الرجوله موقف كلمه وضمير
ربنا يرزق كل البنات الزوج الصالح ومن يتقي الله ويعامل ضميره قبل كل شئ


يارب تكوني بخير ياقمر

Heba Gamal Emara يقول...

اميرة

كلام جميل..كلام معقول..مقدرش اقول حاجه عنه :):)

منورانى كتيييير كتيررررر
انا كويسه الحمد لله
وانتى ؟؟؟؟

علياء يقول...

ايه يا عم الكلام الجامد ده؟! :)
لا بجد الله ينــوّر :)
الجواز ده يا هبة والله عامل زي البطيخة.. يا تطلع حمرا.. يا تطلع قرعة :)
وممكن كمان لو طلعت حمرا يكون طعمها مش حلو قوي..
بس واضح من كلامك انك بتتكلمي عن إنسانة عزيزة عليكي.. ومدايقة من اللي حصل لها

am I right
؟!!

Heba Gamal Emara يقول...

اهلا علياء
ازيك
عامله ايه ؟؟؟؟
كويسه
....
يا رب دايما

ميرسى يا علياء ده بس من ذوقك والله يا حبيبتى

هى فعلا تجربه تخص شخص عزيز _او كان عزيز_

والله موضوع البطيخه ده ممكن يتحل لانك هتشوفى البطيخه كويس كويس كويس اوى اوى اوى قبل ما تشتريها وهتعرفى من ملامحها الخارجيه هى من جوا عامله ازاى .....؟؟؟؟؟؟؟؟

ورنبا يوفقنا للى فيه الحير
مقبوول مرورك يا حبيبتى ،،، ومنورانى هنا ....

علياء يقول...

لا لا لا
ما أفتكرش يا هبة انه في جميع الاحوال المظهر بينم عما في الباطن..
كتير المظهر بيخدع.. "والملامح الخارجية" اللي بتقولي عليها دي ممكن تكون مزينة أمام الإنسان من الخارج.. وتكون مجرد ماسك لإنسان مختلف وراه..

ميرسي يا هبة.. ده نور صاحبة المدونة :)

وربنا يوفقك للخير دايماً :)

عمرو يقول...

عندك حق يا هبة.. بلا جواز بلا نيلة.. قطعت الرجالة يا ختي وقطعت سنينهم
:)

Heba Gamal Emara يقول...

علياء

صح يا علياء كلامك مظبوووط بس صدقينى الملامح الخارجيه اللى انا بقوللك عليها اكيد بعد فترة من الزمن مش هيقدر يخبيها ولازم هيظهر على حقيقته فى موقف من المواقف

اما اذا كان بجد شخص صالح ومحترم ومبيخبيش ورا ملامحه الطيبه وحش كاسر .

وربنا يهدينا كلنا للى فيه الخير ...

:):)

Heba Gamal Emara يقول...

مستر عمرو :

ههههههه
ضحكتنى والله يا مستر عمرو لا بجد الكلام واللغه حاجه جديده خالص ضحكونى بجد....

شويه جد بس :

يا مستر عمرو الجواز فى حد ذاته شئ جميل ..هو التقاء روحين مع بعض او بالاحرى حياتين مع بعض باندماجهم تتكون حياه تالته ملك ليهم ولاطفالهم فى المستقبل
لكن خليك معايا شويه :
مين هى المرأه اللى تقبل على نفسها هدر الكرامه بانواعها ،،ومين هى المرأه اللى تقبل الضرب والاهانه والشتيمه، ومين هى المراه اللى تقبل على نفسها الحبس وكانها قطعه اثاث عنده وقت ما يعوزها يحبها ويهتم بيها ووقت ما ينتهى المراد يرميها زى ال....ويرمقها بنظرات لا استطيع وصفها ........

انا مع حضرتك طبعا ان فى سيدات يستاهلوا اكتر من كده لسوء معاملتهم لازواجهم وطريقتهم الخاطئه فى المعامله والنطق الخاطئ ومنها هذه الردود

بس انا هنا بتكلم عن النوع الحلو البناتى (زى انا طبعا) ههههههههه
اه والله فى بنات زى الملائكه بيكون كل ذنبهم انهم بنات وبيتاخدوا بذنب باقى النساء من المعامله السيئه فقط لانضمام النوع التانى للنوع الاول

طبعا مش هقدر اتكلم عن ظلم الرجال من سيدات مثل رؤساء العصابات وده لان انا مش بحب النوع ده اصلا ومش عايزة اتكلم عنه وربنا يبعدنى عنهم

وفى النهايه ادعو الله انا يزوج كل بنات وشباب المسلمين وان يستجيب لدعواى فى مقالتى ....

شوفت بقى يا مستر عمرو تعليق قد ايه ؟؟؟....


نورت المدونة بعد غياب وفى انتظار مرورك القادم،
اما هذا المرور فهو مقبول بالطبع ،،،،

الشاعر الفنان أحمد فتحى فؤاد يقول...

أختنا الصغيرة العزيزة
عندك حق فى كل كلمة
أحييكى بشدة
مدونتك جميلة
سعدت بزيارتك
بس طلبى الوحيد أو رجائى بس لو تكبرى الخط شوية
احمد

Heba Gamal Emara يقول...

الشاعر الفنان احمد فتحى فؤاد:

مرحبا بك فى اول زياره للمدونة وبجد والله منورنا جدا

اكرمك اله على كلامك وميرسى جدا لذوقك ...

اعزك الله يا اخى بس خطا الخط ده خطا غير مقصود وجارى تصليحه فى التدوينات القادمه

تحياتى ،،،،

blue-wave يقول...

التفكير مطلوب
ولكن اليأس مرفوض
تحياتى

Heba Gamal Emara يقول...

blue-wave
اهلا بيك

طبعا كلامك مظبووط وسليم
الزواج يحتاج الى تفكير عميق بشده مش كبير وبس ..... وربى ما يوصلنا لمرلاحله الياس ابدا ...

مقبوله تحياتك وتقبل احترامى ،،،

Aиgel يقول...


مساء الورد
أزيك يا بوب عامله ايه ؟

للأسف ده يا هبة اللي بيحصل كتير
لكن لابد والاختيار الجيد وبعد ذلك فليحصل ما يحصل لأنها ستكون مشاكل طفيفة ومعتادة فا لازم تختار الأول كويس عشان مترجعش تندم أنها اتسرعت وانبرهت به خارجياً ..


ليكي تاج عندي تعالي استلمي (:

Angel love

Heba Gamal Emara يقول...

انجل حبيبه قلبى
عامله ايه
واحشانى جدا جدا والله


كلامك مظبوووط يا قمر

جايه حالا اهو استلم التاج :)

Tamer Moghazy يقول...

"عانس" احسن مليون مرة من لقب "مطلقه"

صدقيني احنا بس المجتمعات اللي بتدقق في المسميات دي والناس بره بيبصوا لقدام وبيتعلموا من كل تجربة وبيعرفوا لما يقعوا يتعلموا ازاي يعتمدوا على نفسهم ويقوموا تاني..

حاسس اننا هنا بنضيع وقت كتير على المظهر والاطار الاجتماعي بدون ما نحقق الهدف منه..!!

Tamer Moghazy يقول...

كل سنة وانت طيبة يا هوبه :)

Heba Gamal Emara يقول...

timo
ميرسى على تعليقك وسؤالك وتهنئتك ::):)

صديقة الشوق يقول...

للأسف الآن لاتوجد إلاّ من تفكر بالثوب الأبيض بعيداً عن حجم مسؤليات ومهام ذاك الثوب
ترتديه ساعات قلائق لكنها تبقى حاملة لمسؤليته العمر كله
تحياتي

Heba Gamal Emara يقول...

اهلا وسهلا بيكى اخت فاطمة

منورانى فى اول تعليق ليكى فى المدونه
ويا رب دايما تكونى موجوده معايا هنا على طول

للاسف يا فاطمه البنت ساعات بتكون عايزة ترتدى الفستان الابيض وخلاص بس كمان هى ممكن تكون بيتضحك عليها



منورااااانى ويا رب تيجى هنا على طول :):))