02‏/04‏/2010

مـــــــــــــن أنـــــــــــــا

من أنا ؟؟؟؟
أنا شخص مفرط الحساسية ...يمكن
أنا شخص بحب الناس كلها ....أكيد
أنا شخص طيب أوى وعلى نياتى ....طبعا
أنا شخص بيضحك عليه كتير ....مش عارفه
فى الواقع كل هذه التعريفات تقترب من المثالية ولا تليق بى ولكن ،،
أنا بنوتة نفسها تنول رضا أبوها وأمها بأى طريقه ،
أنا بنوتة عايزة تنول أعلى المراكز العلمية لتحقيق حلمها وليفخر بها أبواها ،
أنا عاشقه قديمة ل أم كلثوم وعبد الحليم ونجاة و وردة و فايزة ،
أنا انسانة حساسة جدا جدا لأقل حاجه ممكن تتقال حتى ولو كانت هزار ،
أنا طيبه جدا لأبعد الحدود علشان كده بصدق كل اللى حواليا ،
أنا بمجرد اقترابى من أى فتاه اعتبرها على الفور صديقه لى وفى النهايه انكسر وانخدع بسببها ،
أنا انسانه فقدت الثقه بوجود اصدقاء حقيقين لانصدامها بمن كانوا اصدقائها ،
أنا انسانه ابتعد عنى (اصدقائى) لكثرة اهتمامى بهم ،
أنا انظر إلى نفسى كثيرا فى المرآه ولا أصدق ما يقال عنى ،
أنا أنظر لمن حولى فلا أجد من تشاطرنى عن حق فرحى وحزنى وألمى
أنا ....أنا مش عارفه أنا إيه ؟؟؟؟؟

هناك 16 تعليقًا:

داليـ ـ ـ ـ ـ ـ ــــا يقول...

السلام عليكم

ازيك ياهبه

بالنسبه لحلمك عشان خاطر ماما وبابا
ربنا ينولك الا فى بالك ويحقق ليكى احلامك

بالنسبه لطيبتك والغدر الا شوفتيه من اصدقائك ده خير ليكى لانهم ميستهلوش انهم يكونوا جزء من حياتك

ربنا يكرمك وتلاقى الا يقدر يشاركك فرحك وحزنك والمك وكل ما فيكى

تحياتى الغاليه

Heba Gamal Emara يقول...

داليا :
وعليكم السلام يا جميلة

ربنا يخليكى يا رب ويستجيب لدعواتك

كلامك جميل اوى
والله منورالى المدونة
ماهو زى ما انتى شايفه كده
المدونة بقت هوووووووووووووووووووو


:):):)
حسك فى المدونة كده على طول

علياء يقول...

ربنا ما يجعل المدونة هوووو أبداً طول ما حسك ف الدنيا يا جميل انت :)

روّقي كده وسيبك من أي تفكير في أي حاجة تزعل خااالص ..

ابتسمي للحياة يا هبة ..
ابتسمي بقولك ... أيوة كده :)

Heba Gamal Emara يقول...

عليا
اهئ اهئ اهئ
شوفتى يا عليا المدونة بقت هو ازاى بعد ما كانت مليانة ناس
بس يلا منورين برضه والله


ادينى ابتسمت اهو :):):):):):):):):):):):):):):):):):)

باحث عن حب يقول...

صلى على رسول الله
بصى قولى الاول (اللهم اجعلنى عند خير ما يظنون واغفر لى اللهم ما لا يعلمون)
ثانيا انتى بنتوته حلوة صغنونة قلبها ابيض زى الفل
انا مش باجامل فعلا انتى على نياتك وطيبه قوى ولما بتعرفى حد بترطبتى بيه جدا وبتهتمى بيه ونفسك تلاقى اللى يهتم بيكى زيك
ومش هتلاقى تعرفى ليه..........؟

أنا أنظر لمن حولى فلا أجد من تشاطرنى عن حق فرحى وحزنى وألمى

انت قولتى كده علشان الناس كلها مش زيك
بصى قاعده من عندى هديه
ارتحت فى الدنيا دى كلها
(الملائكه لا تسكن الارض)

بصى كلمه اخيره وانا بحب اسم هبه علشان اختى الصغنونه برضوا اسمها هبه

اثبتى على ما انتى عليه
فالقادم اسوء بكثير فلا تتخلى عما تحلمين به ولا تطمحين اليه ونمى مبادئك ولا تتخلى عنها
ولكن اجعلى كل ما تفعلينه للاخرين لله ولا تنتظرى منهم ابتسامه لك او كلمه شكر
او حتى كلمه عزء فى حزء او تهنئه فى فرح
ذالك واعتقدى به سبحانه
اما الصداقه
فمنعدمه هذه الايام
الثقه بالناس ليس كما سبق من الزمن
النفوس تغييرت والقلوب تبدلت
ثقى به سبحانه
ولكى كلمه اخيره
(من كان الله معه فمن عليه ومن كلن الله عليه فمن معه)
كونى مع الله

الشاعر الفنان أحمد فتحى فؤاد يقول...

هبه

أنتى هذه الإنسانة التى تحدثتى عنها ...
أبدا أبدا لا تحاولى أن تغيري منها شىء
فقط إدعميها نفسيا و قويها و علميها فوق كل ماذكرتى

فنحن دائما ما نحن عليه

وفقك الله لخير ما يرضاه

Heba Gamal Emara يقول...

باحث عن حب :
اهلا وسهلا بيك معايا هنا فى مدونتى المتواضعة كزائر جديد وان شاء الله زيارتك دى مش تكون الاخيرة

على فكرة كلامك رد فيا الروح من تانى
والله الواحد فعلا بيحس باحساس جميل لما يلاقى الناس اللى حواليه فعلا مهتمه بيه وبتقدر هو بيعمل ايه علشانهم

شكرا ليك جدا




ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الشاعر الفنان أحمد فتحى فؤاد :
اهلا وسهلا بيك
تعليقك جه متأخر بس مش مشكله منور دايما والله

وربنا يخليك فعلا على الدعوة الحلوة دى

داليـ ـ ـ ـ ـ ـ ــــا يقول...

ايه ياهبه ازيك ياحببتى

فين كتاباتك ايه مافيش بوست جديد كده

هبه مش عيزاكى تيأسى كده

تحياتى ياقمر

Heba Gamal Emara يقول...

داليا : ازيك يا جميلة

والله العظيم ربنا لوحده اللى عالم انتى بجد كنتى واحشانى قد ايه

والله تعليقك فعلا منور

مش موضوع يأس ولا حاجه هو بس المشغوليات بتعتنا انتى عارفه وكمان فى مشاكل فى الجامعه عندى بسبب التقدير بتاعى لاننى مظلومة ظلم بين فى ماده انا كنت حليت فيها كويس جدا جدا


داليا : انا نفسى تبقى عندى على فيس بوك لو انتى عايزة ممكن تضيفينى من بره او ابعتيلى اسم الاكاونت بتاعك وانا اضيفك

أميرة الأحلام يقول...

حبيبتى عامله ايه
يارب تكونى بخير
ربنا يحققلك يارب كل الي بتحلمى بيه
حسيت وانتى بتتكلمى انك بتتكلمى عنى انا
لانى تقريبا كده زي ما قولتى
بس عمري ما اندمت على الي انا فيه ابدا
لان عارفه ان ربنا معايا
ومتاكده ان انابطباعى دى صح مش غلط
العيب مش فينا العيب في كل الظروف والبشر الي حوالينا
ربنا معاكى ياقلبي
دمتى بحب وود

إيثار يقول...

بصراحة أول جزء في البوست خضني
وحسيت إن اللي بيتكلم ده مخدوع في نفسه

إنتي مش لازم تكوني أي حاجة من الصفات دي لأنك مش مطالبة بكدة ولو ده حصل يبقى إنتي المظلومة لانك اتمنعتي من مشاعر كتير من حقك تكوني شريرة عصبية قلبك حجر من حقك تحبي وتكرهي حتى لو كانت مش ظريفة للبعض لكن انتي محتجالها في كتير من الاوقات لانك انسانة حرة في مشاعرك ولو قلتلك انك طيبة تبقى قمة الظلم ليكي

وانتي بكدة مش محتاجة لتعريف لان انسانة دي كفاية كتعريف عظيم يفتخر بي أي كائن حي

Heba Gamal Emara يقول...

أميرة الاحلام :
كلامك جميل أوى أوى وفرحنى اوى اوى
واحشانى جدا جدا والله

والله لما قريت كلامك ضحكت وحسيت بثقتى بترجع لى تانى
شكرا
ــــــــــــــــــــــــــــــــــــــــــــــــــــــــــــــــــــــــــ

عاشقة الحب :

ومين قاللك انى مش مخدوعة
انا مخدوعة فى نفسى وفى اللى حواليا يكفى ان كل من كنت اثق فيهم خدعونى وذهبوا وكما لم نكن على معرفه من قبل

صدقينى نفسى اتمتع باى من المشاعر الجميلة الحلوة اللى انتى ذكرتيها دى
بس تعملى ايه
انا مقدرش ابدا اعمل اى حاجه وحشه حتى مع اللى خدعنى

بس بقول
حسبى الله ونعم الوكيل

شرفتينى

باحث عن حب يقول...

استأذنك
اضيف
مدونتك
الى مدونتى
المتواضعه

علياء يقول...

هبة..

ازيك .. أخبار المذاكرة والامتحانات؟

ربنا يوفقك يارب

معلش مش بسأل بقالي فترة والله مشغولة جدا ..
المهم خلي بالك من المذاكرة وارجعيلنا بموضوعات جميلة بقى :)

Heba Gamal Emara يقول...

باحث عن حب :
يا خبر ابيض
وهو انا اطول يا فندم

شكرا جدا جدا على طلبك
وطبعا طبعا تفضل وانا اللى المفروض اقول شكرااااااااااااااا

ــــــــــــــــــــــــــــــــــــــــــــــــــــــــــــــــــــــــــ

Heba Gamal Emara يقول...

عليا :
تسلمى يا جميلة وربنا يخليكى ليا