الأرتباط
مؤخرا الكلمه دي طلعلها مسميات كتير وبقى السؤال التقليدي لأي حد دلوقتي انت مرتبط رسمي
ولا عاطفي؟؟؟؟ هو اصلا يعني ايه ارتباط عاطفي
يعني مصاحبه يعني الأخ اللي انتي ماشيه مع
اه
ده يقربلك ايه يعني
لو ماشيين مع بعض في الشارع وقبلتك واحده صحبتك من زمان وجيتي تعرفيها عليه هتقوليلها
ايه صاحبي !!
ولا هتقوليلها محسن ابن عمتي
طب بلاش انتي تعرفيه لصحابك لما تبقوا ماشيين مع بعض بردو وهوا قابل واحد صاحبه المرادي
هيعرفه بيكي ازاي هيقوله ميرو صاحبتي
!!
ترضيها على نفسك
انك تبقي ف حياة الشخص اللي بتحبيه مجرد صاحبه
مع علمنا ان المصطلح ده غربي اصلا يعني لو بصينا الغرب بيستخدموا المصطلح ده ازاي اكيد مش
هتبقى فخوره اوي انك صاحبته ولا هوا صاحبك او بلفظ اشيك شويه مش هتبقى فخوره ان انتي الجيرل فريند بتاعته ولا هتبقى فخوره ان هوا البوي فريند بتاعك بالعكس دي حاجه تكسف ليه مايبقاش اول واحد احبه واديله مشاعري وقلبي يبقى هوا خطيبي او جوزي
ليه ماتبقاش اول كلمه حلوه اسمعها من خطيبي او جوزي
ليه مايبقاش اول رقم راجل غريب يتحط على موبايلي يبقى رقم خطيبي او جوزي
ليه مايبقاش خطيبي او جوزي اول راجل فحياتي
ليه مايبقاش خطيبي او جوزي فخور اني معرفتش قبله حد وانه الأول والأخير
ليه اضيع على نفسي فرصه اني اشوف نظره فرحه فعيون خطيبي ا و جوزي لما اقوله انك اول واحد
تقولي كلمه حلوه ليه اسمح لحد مايستهلش اي حاجه اني اديله حبي واسلمله قلبي عادي كدا في حين اني عارفه ان
الموضوع بايظ بايظ هوا لو بيحترمك مش هيخرج معاكي وايدك ف ايده
ومش هيخلي حد يلسن عليكي بكلام ملوش لازمه
لو بيحبك هيتكسف يجي يسلم عليكي وصحابه معاه عشان مايخليش صحابه يشوفوكي لأنه بيغير عليكي
لو بيحبك هيعمل المستحيل عشان يجي يخطبك
لو بيحبك كان رضي على اخته انها تعمل
زيك لو بيحبك هيغير عليكي من نفسه
عشان هوا مايبقالكيش حاجه
بلاش تعملي حاجه تقللك قدام نفسك عشان فيوم من الأيام لما بنتك تعمل زيك تقدري وبقلب جامد
تقوليها ده غلط وعيب واهم من الغلط والعيب انه حرام طب هوا الحب حرام؟
لأ الحب مش حرام بس لو في الطريق الصح
مفيش حاجه اتحرمت غير لأسباب مهمة جدا
يعني ليه الخمرة حرام ؟
عشان مضره وبتغيب العقل ليه السجاير حرام؟
عشان بتجيب سرطان
ليه لحم الخنزير حرام؟
عشان بيجيب كل الأمراض المستعصيه عشان الخنازير غذائها الأساسي الزباله
طب ليه الصحوبيه حرام؟
عشان مضره لسمعه البنت وبتكسر قلبها
عشان في كل الأحوال يا بتبقى علاقه فاشله او لو كملت بالزواج بيبقى زواج فاشل وعشان الأسلام
جمييل بيحافظ ع المرأه وبيصونها وبيصون كرامتها وهيا مع ذلك بتكسر قلبها بأيديها وتديه لواحد مايستهلوش مايستهلوش ايه ده بيحبني ووعدني انه هيجي يتقدملي بعد مايكون نفسه
مووووت يا حماااااااااار
جربي كدا تعملي عليه حوار وتقوليله الحقني يا كريم بابا جايبلي عريس وهاييجي يتقدملي
رسمي يوم الخميس اللي جاي واهلي موافقين عليه مش هعرف ارفضه زي المرات اللي فاتت والراجل مافيهوش غلطه عشان اتحجج بيها الحل الوحيد انك تيجي بكره تقعد مع بابا وادي دقني ان عبرك ولا جه وهتلاقي الكلام اللي بيتقال
طب انا فايدي ايه اعمله اروح لابوكي واقوله انا طالب لسه باخد مصروف من اهلي وجاي اطلب ايد بنت حضرتك ونعيش ع المعونه بقى لغايه ماربنا يفرجها انا لسه ورايا هم مايتلم ع الأقل لسه قدامي 7 سنين ع الأقل لغايه مااتخرج وادخل الجيش واشتغل واجيب شقه وشبكه و عفش وانتي حتى مش راضيه تقفي جمبي وتساعديني وتستنيني وانا اللي كنت فاكرك بتحبيني مش عايز اعرفك تاني وانا ندمان اني عرفت واحده زيك وهيطلعك انتي اللي غلطانه وخاينه وبنت 60*70 ولو طلع عنده دم شويه وجه يتقدم هيترفض برضو
عشان اكيد اهلك بيخافو عليكي ومش هيرموكي لواحد لسه مخلصش دراسته ومعندوش اوضه حتى تعيشو فيها خليكي غاليه ومترخصيش نفسك مع حد لا هيصونك ولا بيحبك وخلي مبدأك في الحياه ان الأرتباط يا
دبله في اليمين يا دبله في الشمال غير كدا اسمه استهبااااااال "منقول للأمانة "
بس انا فعلا مقتنعة بالكلام اللى اتقال فوق بنسبة مليووووووووووووووون ف المية وكنت عايزة
اكتب فعلا بوست عن الانتمة لحد ما لقيت جروب ف الفيس بوك بيقول الكلام ده و اول ما قريته حسيت انى قريت اللى انا كنت عايزة اكتبه بالظبط وهو فعلا قال كل حاجه انا كنت هقولها بالظبط وعجبتنى اوى آخر جملة " الارتباط عندى يا دبلة ف اليمين يا دبلة ف الشمال غير كده يبقى
اسمه استهبااااااااااااااااااااااااال "
هناك 6 تعليقات:
صح إنتى بتتكلمى صح جدا
و علشان كده أغلب الشباب اللى مرتبطين عاطفى و مش رسمى زى ما قلتى .. لما بيحبوا يرتبطوا بجد و رسمى بيدوروا على حد الإرتباط عنده يا دبلة فى اليمين يا دبلة فى الشمال
خالص تحياتى
دمتى بخير
السلام عليكم ورحمة الله وبركاته
ازيك يا هبه ؟؟
مدونة جميلة يا قمر
بصي ... الموضوع بجد لما قرأته مؤلم أكتر مما تتخيلي... مؤلم جداااااااااااا بجد يعني
كل الكلام اللي اتكتب مظبوط 100%
ودا اللي بيحصل فعلاً
وعن تجربة البنت مبتخرجش بحاجة غير قلب مكسور ... وذكريات زي الهباب ... ونفسية محطمة ... ونظرة انحطاط لنفسها
وكل شيء ممكن تتخيليه
بالرغم من ان الامر معايا متعداش كتابات على كي بورد
يعني ولا في موبايل ولا في نيلة غيره
بس المهم إن القلب اتفرط فيه
واصعب شيء ... ان عمر البنت ما تقدر ترجع قلبها نقي تاني وسليم
عمرها ما هتقدر ترجع " أول مرة " في حياتها
وعمرها ما هتقدر تنسى ذكرياتها مهما عدت السنين !!!
وياريت لما بتنصحي بنت غيرك وتقوليلها بلاش ... بتسمع
لا كل واحده عايزه تجرب ... وعندها ثقة ف إن الاحلام الكبيةر الوهمية اللي ف دماغها دي هتتحقق
بس للاسف هي سراااااااااااب
:((
يلا الحمدلله على كل حال
أحمد :
ف البداية عايزة اشكرك جدا جدا لمتابعتك الدائمة لمدونتى
ومتشكرة جدا جدا ل رأيك
وده فعلا اللى والدى بيقوله ليا دائما ... بيقوللى متزعليش ومتحسيش انك مختلفه لانك انتى اللى صح .. :)
دمت بود :))
خابت بك ظنونى :
طبعا انا مبسوطة جدا جدا بوجودك هنا لأول مرة
واتمنى ان زيارتك دى متكونش الأخيرة ابدا
الحمد لله فعلا يا حبيبتى
ولازم تحمدى ربنا مليوووون مرة انك موقعتيش ف حد وحش
والحمد لله كمان ان الموضوع معاكى متعداش غير كتابات على كيبورد
بس برضه زى ما انتى قلتى اتفرط فيه قلبك
ومعلش المرة دى
بس لازم تكونى واثقه ف اى حد بعد كده
وكفاية اللى قلبك مر بيه ...
وربنا يحمى ويستر كل بنات المسلمين ...
ميرسى اوى على زيارتك ♥♥
ازيك يا هبة عاملة ايه...
عايزة اقولك انتى كلامك صح مية في المية وطول عمرى مقتنعة بالكلام ده ولحد دلؤتى الحمد لله ..بس انتى بتقولى ايه المشكلة لو خطيبى او جوزى فرح انى عمرى ما اتعرفت على حد قبله انا هقولك ايه المشكلة..دلؤتى اغلب الشباب لو قلتيله انك عمرك ما اتعرفتي على شاب قبل كده حاجة من الاتنين هتحصل..يا اما مش هيصدقك لان مفيش بنت دلؤتى متعرفش شباب وعاشت قصة مرتين او تلاتة أو ان انتى شخصية معقدة او مقفول عليكي ومش مدردحة..الكلام ده بجد اتقالى بشكل مباشر او غير مباشر وكلمة انتى مقفول عليكي دى دايما بتيجي من عرسان ومرة واحد قالى لما انتى محبتيش قبل كده اومال لما هتحبيني هتعرفي ازاى انك بتحبي وانتى متعرفيش الاحساس ده اصلا.. كلام عجيب والله مش فاهمة هو انا لازم ابهدل نفسي وادخل نفسي في قصص وحكايات عشان ابقى مفتحة ومش معقدة والله لو هو ده اللى هم عايزينه فانا بقى مش عايزاهم...
معلش انا اتكلمت كتير بس الموضوع ده فعلا فارسني
غير معرف :
اهلا اهلا اهلا اهلا بيكى يا كتكوتة فى أول زيارة ليكى هنا
وبعدين انتى تطولى براحتك ،
بصى الموضوع مهم ولازم فعلا نتكلم فيه
والشاب اللى يستغرب منك من انك مؤدبة او انك مقفول عليكى ، ده يبقى انسان مش كويس لانه المفروض انه يكون بيدور على بنت زى دى تصون بيته واسمه وعيلته
و أنا عن نفسى بفضل ان البنت تقعد من غير جواز على انها تتجوز واحد يهينها ويجرحها
وميكونش مهتم بيها ولا بإنسانيتها
تحياتى ليكى واتمنى ان زياراتك للمدونة تتكرر ان شاء الله :))
إرسال تعليق