05‏/08‏/2010

نظرية الأنتمة وما يقابلها من آراء عن التعقيد

ف البداية انا كنت حابة امتنع عن التدوين شوية ...لكن اللى شوفته النهاردة ... يخلينى لازم اكتب وادون ...
"ملحوظة " : يمكن الكلام ده ميعجبش أى ولد أو أى بنت ... لكن دى آراء .... واللى عنده رد يكتبه بصراحة .... "
النهاردة أول مرة أشوف اللى أنا بحكيلكم عنه ده ...
انا بجد زعلانه ع البنات اللى بمنتهى السهولة بيتضحك عليهم بكلمة حلوة او نظرة من اياها
بيكون غريب عليا انى امشى ف حته الاقيها كلها مزدوجة يعنى اتنين اتنين ...و ايه بقى .. نظرات ... نظرات ... همسات .... لفتات... وصلت لمد اليد ....
تخيل كده لما تبقى ماشى ف امان الله ف الحرم الجامعى اللى هو المفروض مكان العلم والتحصيل والتفوق .. تلاقى ايه ... ممر الحبيبه ... اه هما الطلبه اطلقوا عليه الاسم ده ....الممر ده متلاقيش واحد او واحدة قاعد او قاعدة لوحده او لوحدها .... :)
الأغرب بقى لما دخلت بالصدفة والله لكلية الآداب انطلاقا منها على كلية الحاسبات والمعلومات ، علشان موضوع خاص بالدراسة ... المهم نرجع للآداب وهى اسم على مسمى فعلا ... ممر هناك اسمه ممر " جيمى " ف الاول مصدقتش اللى بيتقال عنه ..... لكن اللى شوفته النهادرة ميتوصفش .....
والله العظيم اول مرة اشوف ولد بيضرب بنت وهما بيضحكوا وبيهزروا ... ويكون هى تصرفها ايه بدل ما ... تييييييييييت تيييييييييييييت تيييييييييييييييييييت .... لا هى تصرفها ارقى من كده .. هى بمنتهى السهولة .. قامت ضربته هى كمان
ها ..... ازى الحااااااااااااااااااااال ... ،
انا النهاردة زعلت ... يعنى يمكن كنت بشوف ناس كتير من دول حتى عندى ف المدرج بس عمرها ما وصلت للضرب ....
زمان البنات اللى كنت مصاحباهم ... اختلفنا ف نقطة ان البنات دى كانت معتبرة _ الولاد يعنى _ زمايل.. وعادى جدا لما نتصرف معاهم بتلقائية ....
اقنعونى كتير ساعتها .. ولما رفضت ... قالولى ... سيبك منها دى معقدة .....
قلت لهم هو المؤدب والمحترم يبقى معقد ....
قالولى دى ملهاش علاقه بالادب والاحترام
مرضيتش اكمل كلامى معاهم ... لاننى حسيت انى ههدر تفكيرى ورأيي معاهم ... ويا ريتهم يستحقوه .. انا اساسا معرفش انا صاحبتهم ازاى ...؟؟؟؟!!!!
قلت لهم طيب .... خليكوا انتوا كده وسيبونى انا بقى ف حالى بالتعقيد بتاعى ...
ولازلت انا مبسوطة بنفسى كده وعمرى ما هغيرها علشان خاطر اى حد او علشان خاطر اى عادات وتقاليد سخيفة تقتضى وجود انتمة بين البنت والولد ف الجامعة

هناك 14 تعليقًا:

باحث عن حب يقول...

السلام عليكم
بصى يا هبه
انتى صح
ليه
لانك لسه على الفطره السليمه ولسه
المدنيه بكل وحشتها لسه لم تؤثر عليكى خليكى معقده فى نظرهم بس انتى اللى صح رغم انك اللى بتسبحى ضد التيار
اقسم بالله نفس المشكله عندى بالضبط بس انا هقولك على حاجه
لكل واحد فى حياته رساله بياديها رساله خاصه بيه فى الدعوه الى الله باخلاقه ومعاملاته
ميهمكيش اللى يقوله
والبعد عنهم غنيه بعد النصح لهم بقدر المستطاع وبعد كده يبقى الدعاء لهم بظاهر الغيب

المشكله يا هبه مفيش مبادىء مش هقول دين هقول اخلاق تربيه
صلى على النبى واهدى وربنا هيكرمك بصديقات انتى اهل لهن بكل ما فيكى من فطره وقلب سليم ان شاء الله
وربنا يهدينا وكل شبابنا يارب
ملحوظه
ارجو ان لا تكون زعلانه منى بسبب كلامى فى التدوين هالسابقه
ارجوا الا تمتنعى عن التدوين
علشان احنا اتعودنا على كلامك
ربنا يحافظ عليكى

Heba Gamal Emara يقول...

اشكرك يا محمود

وأكيد طبعا أنا مش زعلانة .....


وشكرا ليك وع كلامك الجميل ....

وكمان شكرا ع متابعتك مدونتى :):)

ديالا يقول...

بصي ياهبه انا برضه بزعل علي البنات دي اوي

بس برجع اقول هما ليه مبيزعلوش علي نفسهم وهما عارفين انهم حاجه رخيصه الولد بيتسلي بيها وبيسبها

كل بنت مفروض تحافظ علي نفسها ولو معملتش كده يبقي متستحقش احترامنا اصلا

وعلي فكره انا برضه في كليتي كان عندنا ممر العشاق ده

كنا اصلا بنخاف تعدي من ادامه

ربنا يقويكي ياقمر ويثبتك ويثبت كل البنات علي الفطره والاحترام

Heba Gamal Emara يقول...

اهلا وسهلا بيكى ديالا ف اول زياره ليكى هنا لمدونتى

ويا ريت المرة دى متكونش اخر مرة

ويا ريت كامن تتابعينى ف مدونتى ع طول

كلامك صح يا ديالا

وربنا يستر ع كل البنات

وميرسى ع متابعتك مدونتى :)

أميرة علي كوكب مهجور يقول...

دي كليه ايه يا هبه اداب المنصورة ؟؟

Heba Gamal Emara يقول...

أميرة :

ازيك
عامله ايه
ايه اخبارك

يا رب تكونى بخير يا رب

يعنى انتى بقالك كتير اوى اوى مش بتيجى ولما جيتى ... بتسالى سؤال بس ... ؟؟؟!!!


يلا مش مشكلة ... انا هعديهالك المرة دى ....لكن المرات الجايه لا مومكن تحصل ابدا ..... :))


المهم يا ستى
دى مش اداب المنصورة لاننى انا اساسا مش من المنصورة ... انا من القاهرة ... والجامعه اللى انا فيها هى جامعة عين شمس

وبالتالى انا دخلت كليه الاداب جامعه عين شمس علشان اسالى على حاجه زى ما هو مكتوب ف المقال ... لكن انا اساسا تخصصى تجارة ....:):):)


منورة يا جميلة

داليـ ـ ـ ـ ـ ـ ــــا يقول...

هبه
الكلام اللى انتى قولتيه ده مش غريب عليا خالص

شفته فى الحرم الجامعى عندنا كتير

كان عندنا حته إسمها بين الميزانين
تعرفى المنطقه دى أنا بقالى أربع سنين بالكليه معرفتهاش الإ وانا بجيب نتيجة سنه رابعه
ههههههههههه
دى بقه ياستى بتاع الشباب والبنات
هيصه يعنى

كلمت واحده على الموبيل من زملائى بقلها إنتى فين قالتلى أنا فى بين الميزانين قلتلها فين دى قالتلى هتستهبلى قلتلها والله ما أعرفها
قعدت تشرحلى فيها وتقلى دى بين مدرج واحد ومدرج تلاته قعدت الف وبردوا معرفتش اوصلها ولما هى كلمتنى قلتلها قابلينى عند مدرج تلاته وقابلتنى قالتلى تعالى بقه اوريكى بين الميزانين
وشفتها وياريتنى ما شوفتها ولا عرفتها

أصلى بعيد عنك كنت دحيحه بتاع محاضرات وبس

ربنا يعديكى منها على خير ياهبه

Heba Gamal Emara يقول...

داليا : ازيك يا بنتى
عامله ايه ....

والله واحشانى ... فينك بس .....


بصى ... انتى صح ... والكلام ده فعلا بيتكرر كتير ... واحنا البناويت الغلابه المؤدبين ... مفيش ف ايدينا اى حاجه نعملها للأسف .....


سيبك انتى ... رمضان كريم :)

Tamer Moghazy يقول...

ده انا على كده مش بس معقد..
ده انا عجوووز كمان..
اصل على ايامي ما كانتش الامور وصلت للدرجة دي..
بس البنت هي العامل الرئيسي لانها بتسمح للولد بالتجاوزات دي..
وكمان بتشجعة يتمادى بخشونتها وتصرفاتها وكأن البنت بقت (زي) الولد..!!
فين انوثتها ورقتها في التعامل..؟؟
بجد.....يا خسارة..!

Heba Gamal Emara يقول...

Timo.:

اهلا وسهلا بيك
بقالك فترة طوييييييييييييييله اوى مش بتيجى


فعلا كلامك اللى انت بتقوله صحيح
بس اكيد برضة الولد بيكون عليه نسبة من المسئوليه ....


وفعلا يا خسارة .....

غير معرف يقول...

اولا تحية طيبه لكى وثانيا الحمد لله انى لست وحدى من يصرخ مما اشرتى اليه عن نظرية الانتمه ولكن هل فاقد الهويه الذاتيه - الذى هو صنيعة التليفزيون و فاقد للرأى السليم - ننتظر منه التصرف بعقلانيه وضمير . بالطبع لا وليتها تنتهى عند ذلك بل لا تسلمين من انتقاداتهم المليئه بالجهل واتهامات بالرجعيه والتخلف وقلة الثقه بالنفس وما الى ذلك من اتهامات انتى منها براء . انا لست ممن يعتمدون نظرية المؤامره ولكن هل كل هذا التردى فى اغلب جوانب مجتمعنا ظهر من تلقاء نفسه ؟؟؟؟؟؟؟

Heba Gamal Emara يقول...

غير معرف :

اهلا وسهلا بيك فى اولى زياراتك للمدونة

شوف ، انت كلامك صحيح ..بس برضه البنت فاقده الهويه الاتيه دى ... لازم على الاقل انه يكون فيها ولو نسبه بسيطة جدا من الفطرة ان اللى هى بتعمله ده غلط

بس للاسف اى بنت مجرد ما تيجى تكلم اى ولد .. بتبقى فرحانة ومبسوطة والحاجات دى

وهى للاسف مش عارفه انه بيضحك عليها


وبعدين نقطة كمان ، التردى فى مجتمعنا مظهرش كده لوحده .. بالعكس .... الناس هما السبب ويمكن للغرب دور كبير فى الموضوع

لان الشباب اساسا واخدين الانتمة دى منهم ...

فى نهايه كلامى .... انا بشكرك جدا جدا على متابعتك مدونتى ، واشكرك كمان على كلامك

واتمنى انك تزور المدونة كتير :)

ahmed zaky يقول...

السلام عليكم و رحمة الله و بركاته
كلامك يا هبة صحيح 100% و أرى أن العامل الأساسي في نشأة مثل هذه الصداقات و العلاقات _هو التربية الخاطئة في البيت و خلو معظم البيوت من روح الحب و التعاون بين أفراد الأسرة جميعا , و غياب تام لدور الأبوين ...فالفرق بين بيت يسوده الحب و المودة وبين بيت يخلو من الحب و المودة هو نفسه الفرق بين بنت أو ولد يقومان بعلاقة طبيعية منضبة لهاحدود وضوابط محددة وبين بنت أو ولد يطلقان لعلاقتهما العنان وتميزها روح الابتذال
.

Heba Gamal Emara يقول...

احمد زكى :

اهلا وسهلا بيك فى أول زيارة ليك للمدونة
وان شاء الله متكونش الأخيرة

رأيك مظبوط يا أحمد ... وهى دى المشكلة اللى معظم البنات مش واخدين بالهم منها ....
ربنا يعفينا ويعفى المسلمات والمسلمين جميعاً

اتمنى ان زيارتك تتكرر تانى ...