27‏/08‏/2011

خواطر مستقبلية .. لك أنت .. وانت وحدك :)

أول هدية .. اكيد طبعاً فاكرها ، ما انت عمرك ما بتنسى أى حاجه متعلقة بيا .. دايماً بتفضلني على أى حاجه عندك ، حتى لو كانت الحاجة دى هى انت :( وعلى فكرة .. الموضوع ده بيضايقنى :( المهم بقى .. نرجع لموضوع الهدية .. كانت " ميدالية كريستال " مكتوب عليها اسمى واسمك .. وبينهم قلوب كتيرة صغننة ومن ورا .. لقيت مكتوب عليها " إلى ملك روحى ... وتوأمها ، ربنا يخليكى ليا " ساعتها من كتر ما أنا فعلاً مبسوطة بيها ، خدتها ف حضنى اوى ... وقعدنا نبص لبعض كده .. وانت مستغرب لإنبساطى .. و أنا مستغربة لحبك ليا :) ساعتها أنا مكنتش مبسوطة بس .. لا ، ده أنا كنت كمان منشكحة :) وانت عارف انه مش أى حاجه تخلينى ف الموود ده .. علشان كده .. أنا بشكرك .. لإنك انت .. انت :) وكنت مستغربة اوى .. لإنى لسه من يومين قلت لك إنى عاوزة اجيب ميداليه شكلها حلو ... ومحتارة !! مش بس كده .. انت كمان صممت تكمل لى يومى وتبسطنى اكتر واكتر .. وقلت لى : هاخدك لمكان حلو انتى بتحبيه .. بس مش هقول لك دلوقتى :) قعدنا نلف بالعربية شويه .. وبعدين قبل ما نوصل قلت لى : غمضى عينك :) ، ومتفتحيهاش غير لما اقول لك :) وفعلاً غمضتها ... وبعدها بحبه صغيرين .. لقيتك وقفت ونزلت من العربية وفتحت لى الباب زى الهوانم بالظبط .. وانت بتقول لى : اتفضلى يا هانم :) وبعدين ببص على المكان ، لقيته المطعم اللى أنا بحبه .. الصينى !! من كتر انبساطي وانشكاحى ساعتها .. مكنتش عارفه اقول لك ايه .. بس كنت بضحك وابص لك ، واضحك وابص لك وهكذا :) دخلنا المطعم سوا .. اليوم ده قعدنا نرغى فيه كتير اوى .. اتكلمنا ف كل حاجه تقريباً ، بس على الرغم من كده .. عمرى ما زهقت من الكلام معاك :) بعد ما خلصنا اكل ، لقيتك عامل لى مفاجأة تانيه .. ( مش قلت لك انك مصمم تبسطنى ) تورتايه .. مرسوم عليها صورتى أنا وانت يوم خطوبتنا .. وتحت مكتوب عليها : " كل سنة وانتى طيبه .. كل سنة وانتى حبيبتى .. كل سنة وانتى معايا .. ربنا ما يحرمنى منك " ايه ده !!! ... تصدق النهارده فات سنة على خطوبتى ليك .. صدقتنى لما قلت لك انه معاك انت مبحسش بالأيام :) تصدق انه النهارده كمان عيد ميلادى :) تصدق انه فات من عمرى سنه معاك ، ومش ندمانه عليها :) ياه .. دلوقتى افتكرت .. افتكرت انت ليه كنت عاوز صورة لينا يوم الخطوبة .. افتكرت انت ليه صممت انه يكون خطوبتنا هو هو يكون نفس يوم عيد ميلادى .. :) ولقيت اخيراً اجابه على سؤالى .. اللى سألته ليك قبل كده وانت مكنتش عاوز تجاوب .. " انت ليه صممت انه يوم خطوبتنا هو يكون يوم عيد ميلادى ؟ " والإجابه كانت انك كنت بتفكر ازاى تبسطنى وتسعدنى .. من قبل حتى ما تخطبنى .. ياااااااااااه .. يا بختى بيك :) وبيقولوا لى إنى مثالية ف حبى ليك .. لا .. مش مثالية ... لإنك تستاهل اكتر من اللى أنا بعمله بكتير .. لإنك ملاكي اللى نزل لى من السما .. لإنك كنزى اللى كنت بدور عليه .. :) والملاك اللى نزل من السما علشان يبسط اللى حواليه .. لازم يكون له معامله خاصة ، وحياة خاصة .. وحب خاص :)

هناك تعليق واحد:

Reham Radwan يقول...

انك اكثر من رائعة