18‏/11‏/2009

Test

صديقتى زهرة ارسلت لى هذا الكويز وطلبت منى اجاوب عليه وكانت الإجابات كما يلى :
- من أنت؟
انا انسانه حساسه جدا وفى نفس الوقت طيبه جدا بشهادة من حولى والله مش جايبه حاجه من عندى
- وما الذى تفعله هنا؟
انا هنا بكلم اصحابى وحبايبى وبتعرف علي ناس جداد
- إسرائيل تقصف كل جنوب ممكن بحثا عنك ، أي شمال تقصد؟
ممكن شمال على طول فى حضن ماما وبابا لان هو ده المكان الوحيد اللى بحس فيه بالامان
- أنت مكلف بحذف حرف من حروف اللغة العربية .. أيها ستختار ولماذا؟
ممكن حرف الذال ، وده لانه بعيد فى اخراللوحة وكمان مش موجود فى الحب والليل والسهر والشمس والنجوم والتفوق والصداقه وهى دى الحاجت اللى بحبها
- لو قدر لك أن تدخل السجن فما هي القضية التي تتمنى أن تدخل بها إليه؟
يا حول الله يا رب ،ممكن ادخل السجن فى قضيه .... مش عارفه وانا اتعب نفسى ليه لا يا عم انا لسه صغننه على الحاجات دى
- نحن لا نعيش حياتنا بل نتعلم فيها كيف نعيش. ما تعليقك؟
والله انا رايى ان لانسان طول ما هو عايش بيتعلم
- على مفترق طريق لافتتان ، اليمنى تقول ( إلى حلمك) واليسرى تقول : (إلى ما لم يحلم به البشر) ، أي الطرق ستسلك؟
أكيد طبعا الى اللافته اللى تقول الى حلمك لاننى انا بحلم بحاجات معينه احققها وانا اعرف منين بقى ان ما يحلم به بشر ده هيسعدنى ولا لأ و انا ادخل نفسى فى اللى مليش فيه ليه ؟!
- بجملة واحدة فقط أكتب تعريفاً لكل كلمة من الكلمات التالية:

- الوطن: بلدى اللى بحس فيها بالأمان والاطمئنان

- الأم: حضن دافى جميل وعلم غزير لا ينفذ ابدا ودمعة فى الداخل لمرض ابنتها وقلق وسهر فى امتحانها

- الليل: القعده على الكورنيش وانا بسمع ام كلثوم

- الحب: فى ذاته شئ لطيف ولكن يجب ان يذهب لمن يقدرة ويحترمه

- أمريكا: مبتكلمش عن حد وهو مش موجود

- المرأة: كائن جميل لم يستطع الرجل فك طلاسمه بعد

- الرجل: هو ابى واخى وفى المستقبل _ حبيبى وزوجى وابنى _ (ان شاء الله)

- الصمت: هو كلام كتير يضيع معناه لو اتقال

- الانترنت: مكان واسع للتعارف _فى حدود المعقول والأدب _

- أختر منصباً واتخذ قرارا؟

منصب:وزيرة النقل

القرار: الغاء الميكروباصات والتاكسيات القديمه واستبدالها بعربات اخرى صديقه للبيئه

-قيس، عنترة، جميل…. الذين يقولون شعرا….. وليلى وعبلة وعزة ”صموت”لماذا هذا التغييب للمرأة؟

أعتقد ان الرجل يمتلك اكثر الجرأة للتعبير عن مشاعره و احساسه ولكن المراه فهى خجلا واستحياءا وادبا تحبس احساسها بداخلها

- إلى أين تمضي كلمات الحب بعد أن نقولها؟

أكيد بتفضل موجودة داخل القلوب وبتترك كل أثر جميل وبتسيب ذكرى حلوة

- هل تجد علاقة بشكل أو بآخر بين المرأة وقطاع الطرق؟

لا والله معرفش

-هذا فراق بيني وبينك .. متى ولمن تقولها ؟

اقولها لكل من دبحنى بخيانته وهجره وظلمه

-كيف هو غداً ؟

والله معرفش دى حاجه فى علم الغيب .. بس أكيد احلى

- تمرر التاج لمين؟

للأسف خلاص مفيش حد امرره له لإن زهرة قامت بالواجب ومررته لكل من أعرفهم

هناك 12 تعليقًا:

blue-wave يقول...

جميله هى اجاباتك
تحياتى

sookra يقول...

قلت اصبح بس
واشوف اجاباتك كدا على الكويز دا
ربنا يخليلك بابا وماما

Heba Gamal Emara يقول...

أهلا بك blue-wave
كأول تعليق
أكرمك الله
إحترامى ،،،،

Heba Gamal Emara يقول...

أهلا سكرة
ازيك
واحشانى جدا على فكرة
صباحك زى الفل
ها شوفتى الاجابات بتاعتى
نجحت ولا لأ .. يعنى انفع
:):):):):):):)
ربنا يخليك يا سكرة

عمرو يقول...

أن أول واحد قريت على فكرة.. بس مش عرفت أقول إيه.. وانت ازيك بقى؟
:)

ponpona يقول...

هههههههه وكمان هههههههه
تصدقي انا كمان فكرت في حرف الذال ده .. ولنفس السبب بردو مش عارفه فعلا هما ليه رامينه كده في آخر الكيبورد وكأن باقي الحروف مخاصمينه ، بس انا رجعت في رأيي تاني ، قولت هاشيله ازاي أنا لو شيلت حرف الذال مش هاعرف أذاكر :(
تعرفي لو الامتحانات فيها حرف الذال كنت شيلته علطول من غير ما فكر خالص خالص

ربنا يخليلك بابا وماما ياهبه ويبعد عنك كل الناس الوحشين اليععععععع

:))

Heba Gamal Emara يقول...

مستر عمرو
أهلا وسهلا بيك ودايما ان شاء الله اول واحد
مش لازم تقول حاجة على فكرة
كفايه مرور حضرتك ...
تقبل احترامى ،،،،

Heba Gamal Emara يقول...

بنبونة
ازيك
عامله ايه يا بنتى
واحشانى جدا جدا على فكرة
يا رب دايما بخير
اكرمك الله يا بنبنونة
بس عندك حق لو شيلنا حرف الذال مش هنعرف نذاكر
طب ممكن نخليها ايه امممم ...اممم.. ايوة
لقيتها
ممكن ندح ايوه الدح اللى هى المذاكرة بس بالتقيل اوى اوى
حلو برضه كده رضا
ويخليكى يا بنبونة

ممنونتك

حلم بيعافر يقول...

الواحد زهق من بوستات الماتش اللى ملت البلوجر
بوست خفيف
تقبلى مرورى

Heba Gamal Emara يقول...

اهلا وسهلا بك (حلم بيعافر )
فى اولى زياراتك لمدونتى

اكرمك الله
مقبول مرورك
وتقبل انت احترامى ،،،

واحده من الناس يقول...

هبهوبه
مع عواصف الماتشات واهانات الجزائريين اجى واقولك
ازيك
عايزه تشييلى حرف الذال ياشيخه ده غلبان
الكويز عسوله اوى واجابات حلوه جدا
ويارب يدوم جمايلى عندك
هههههههههههههههههههه

Heba Gamal Emara يقول...

نورة
والله
لسه فاكرة ان صاحبتك عندها مدونة
ربنا يخليكى يا زهورتى

ومردوده لك الجمايل فى الافراح ان شاء الله