23‏/11‏/2009

جرحى أنا

أعتقد أو بالأحرى قاموا بجعلى اعتقد اننى عضو غير مرحب به فى مجموعتهم _شلتهم_ اه يا قلبى كم أكرة هذا الاحساس ،يقول لى شخص عزيز جدا جدا الى قلبى وهو من اجرى عليه واستشيره فى مثل هذه المواقف :متزعليش عليهم ما يمكن انتى اصلا كنتى عضو غير مرحب بيه من الاساس وانتى السبب انتى اللى بالغتى فى توقع رد الفعل منهم لانك بسرعة جدا اعتبرتيهم اصحابك ، وابكى واتساءل وهل يشعرون بهذا الآن ،فقط الآن يشعرون انن لست ملائمة لهم ،بالطبع فأنا أختلف عنهم كثيرا .. انا اسال واهتم واطمئن ،ابلغهم بأى من التطورات التى قد تحدث فى الجامعه لأجلهم ولأجل مصلحتهم ولم لا .اليسوا اصدقائى ..او كانوا ... .
شعرت حينها اننى من المحظوظين بصداقتهم بعد مرور ما تعدى الألف من الايام سويا ،بكيت مرارا وتكرارا على ايامى اللى قضيتها معهم واتخذت قرارا بأن أكتفى بتكوين زمالات عاديه لا اعتقد انها ستدوم او يطلق عليها صداقه العمر كله ، اه الآن تذكرت صديقتى التى اعتقدتها يوما صديقه العمر - اه كم اكره سذاجتى هذه_ اعتقد _وان اكره اعتقادى هذا الذى جعلنى بدوره احسب ان كل شئ جميلا فى هذه الحياه _ انها _اى صديقتى _ تشاركنى هذا الاهتمام ولكنها سافرت وتركتنى وحدى ويمكنكم قراءه ما حدث فى بوست ( الندله ).
اعلم او ممكن -وان كنت اشك فى هذا - انهم من الممكن ان يقرؤا هذا الكلام الآن ن ويرجع شكى الى انهم لا يهتمون بزياره مدونتى من الاساس لان من يملك منهم جهازا هم 2 فقط وسبحان الله هم من بدؤا بالهجرة والبعد والباقى منهم لا اعرف من اين سيعرفون موقفى هذا ،، اراهم يتكلمون ويتحدثون بل ويضحكون وينظرون الى بلا اى اهتمام كما لو لا يوجد بيننا عشره شهور وايام وكما لو اننا لا نعرف بعضنا من الاساس ،، اننى حقا اشعر عليهم بالبأس الشديد وان كان هذا ليس بالغرور فهم من خسروا الكثير والكثير فقد قررت قطع علاقتى معهم وانا ابكى منذ اخر موقف حدث بينى وبينهم ،، بدات باكيه بمسح نمرهم من على الموبايل مرورا بحسابتهم فى الفيس بوك وانتهاءا بالايميل على الماسنجر والذى لم نستخدمه ابدا ...!! / مواقف عده مررت بها معهم منها من اضحكنى ومنها من ابكانى_ويا لكثره هذه المواقف- احسست معهم بهدر الكرامة وبعض الذل فقد كنت اتمنى ان يحبوننى ويتمنون الخير لى مثلما افعل ،فانا كنت من اسال عنهم وهم لا يسالون اقترب منهم وهم يبتعدون ويقول لى عزيزى :ما يمكن سؤالك الكتير ده هو اللى بعدهم عنك ؟! واقل له :يعنى هو ده جزائى مش معقول اللى يسال ويهتم يكون جزاءه النسيان والهجر ..اه يا راسى المسكين -كم هائل من الاستفسارات والاسئله التى اتمنى ان اجد لها حلا تكاد تفتك به- فاننى لا ارى حتى الفضول بعينهم لكى يروا ما اكتبه لعلهم يحسبوننى استذكر فهذا سبب اكيد من اسباب بعدهم عنى ..
بعدها بدأت واحده بالكلام والاخرى بالسلام وثالثه لا اضعها فى الحسبان ،، بعضهم قال لى :طب ما تروحى تعرفى هما ليه بيعملوا كده ..ارد واقول طب وكرامتى مالهاش اى اعتبار ،،ثم ان اكتر شئ بكرهه فى الدنيا هو التطفل لاننى مهما كان عمرى ما هسمح لنفسى ان اتطفل عليهم مهما حصل لاننى حاسسه انهم لو بجد بيحبونى ومهتمين بيا كانوا ندهولى او على الاقل لم يتركونى ويذهبوا بعيدا ،،وخلاص كل واحد فيهم بان على حقيقته اللى كان مخبيها وراء وش جميل مبتسم ومرحب ،،وياما اتخدعت بهذه المظاهر وكم اكره هذا الشعور .... وان قراتم هذا يا اصدقائى او يا من كنت اصدقائى فلا تغضبوا منى ولا تستاءون اعذرونى على جفائى معكم من اليوم والى ان تتغير احوالكم وانتم من بداتم ,,بالنسيان والهجر وعدم الاهتمام ...ايضا اعذرونى اعزائى القراء على ما بدر منى من سوء تنظيم للرسالة فقد كتبتها فى لحظة ونشرتها ولم استطع اعادة صياغتها وكتبتها من قلبى وكما كان يملينى عقلى ،،،،،

هناك 27 تعليقًا:

Lady E يقول...

كلمة واحدة بس هقولها لك

لا تبكي على من لا يبكي عليكي ووقتها هترتاحي

amirelhob يقول...

بوست جميل جدا يمكن هو خد من وقت عشان بعض الكلمات مش مكتوبه صح او مش باينه اوى بس شدينى فيه جمله كتير يمكن لو كتابتها فى الكومنت هعمل بوست بس بجد جميل جدا ومن قلبى بتمنلك كل خير وسعاده وصحه وتوفيق وفحر وابتاسمه تدوم يا رب طول العمر يا رب دايما
وكل سنه وانتى طيبه

sookra يقول...

انتى لسه ضغنونه اوى ياهبه
راحه على نفسك شويه يابيبى هتقابلى من دا كتير
ولايهمك اجمدى كدا وخليكى اد اللى انتى فيه
بت ياهبه اكبرى شويه

علياء يقول...

هبة.. ازيك يا جميل..

أولاً: اعذريني ..عارفة انك ممكن تكوني زعلانة علشان بقالي فترة غايبة عن مدونتك.. بس والله غصب عني.. شوية حاجات ملخبطة كده..

ثانياً: مش مفروض انك تزعلي قوي كده.. عارفة انه شعور صعب انك تواجهي ناس كده.. خصوصاً لما تكوني حساساة وبتتأثري بالشكل ده.. لكن الدنيا عايزة القوي اللي يقف قصادها دايماً يا هبة..
"واللي يهواك اهواه.. واللي ينساك انساه"
صدقيني لازم تطبقي القاعدة دي علشان ما تتعبيش في حياتك..

فيه أبيات شعر رائعة (أفتكر انها للإمام الشافعي)..

ولا خير في خلٍ يخـــون خليله*** ويلـقاه من بعد المودة بالجــفا

وينكر عيشــــاً قد تقادم عهــده *** ويظهر ســراً كان بالأمس قد خــفا

سلام على الدنيا إذا لم يكن بها*** صديق صدوق صادق الوعد منصفاً

وفيه بيت جميييييييل كمان:

إذا المرء لا يرعـــاك إلا تكــلفاً *** فدعه ولا تكــثر عــليه التأســفا

إيه رأيك؟! :) أبيات حلوة ..صح؟

فكيها بقى :) .. وانسي خالص عنوان البوست ده "جرحي أنا"؟!! ... لا لا لا
ماعاش اللي يجرحك يا جميل :)

Heba Gamal Emara يقول...

lady e
اهلا وسهلا بيكى عضوة جديدة فى مدونتى والله مدونتى نورت بيكى فعلا

كلامك جميل اوى بس برضه العشره متهونش الا على ولاد الحرام وانا مش زى الناس اللى عامله زى القطط تاكل وتنسى

بس خلاص هما اللى بدؤا وهحاول اطبق اللى انتى قلتيه :):):)
تقبلى احترامى وابقى تعالى تانى وانا هجيلك اكيد
::):):):):)

Heba Gamal Emara يقول...

أمير الحب

شكرا جدا

Heba Gamal Emara يقول...

سكرة
ازيك يا سكره عامله ايه
يا ري تكونى كويسه
وبعدين بقى ايه انا صغننه دى
ده انا عندى 19 سنه بحالهم
هحاول يا سكرة وربنا يسهل

Heba Gamal Emara يقول...

عليااااااااااااااء
ازيك يا علياء عامله ايه
يا رب تكونى كويسه
واحشانى والله
ايه يا بنتى الغيبه الطويله دى
ابيات جميلة جدا جدا جدا
وهحفظها عندى اكيد
ممنونتك يا علياء
متبقيش تغيبى علينا بقى يا علياء
وهطبق كل كلمه فى التعليق :):):)

أميرة علي كوكب مهجور يقول...

ازيك ياهبه يارب تكوني بخير
عندك 19 سنه بحالهم :) طبعا صغيرة بصي يابنتي اا كان ليا شله كبيرة اوي في ثانوي وكنا ايه نذاكر نأكل نخرج كله مع بعض وبعدالتنسيق كل حد راح كليه ومعرفش التاني وكنت بقول كلامك ده وبعدين دخلت الكليه قابلت ناس تانيه بقاليا اصحاب تانيين ودلوقتي اكتر من اخواتي ده حتي في ناس اتصحبنا في سنه رابعه بس ودلوقتي اصحاب جدا


ياما هتقابلي ناس لسه بدري اوي ع المود ده روقي يا قمر وبعدين هو انا من صاحبتك :)

Heba Gamal Emara يقول...

اميرة
ازيك
واحشانى يا اميرة
يمكن كلامك مظبوط اكتر منى وده وبحكم المعرفه لان اكبر منك بيوم يعرف عنك بسنه بس انا تعبت منهم يا اميرة تعبت خالص وانا اخدت قرار زى ما شوفتى فى البوست
حاضر هروق وطبعا انتى صحبتى انتى وكل البناويت اعضاء مدونة هبه والحياه :):):)

هيثــم رمضـــان يقول...

لا أدري ما سبب البكاء فالبكاء يكون علي أشخاص يستحقون الدموع أما من لا يستحق فلماذا البكاء عليه أو بسببه , من المحتمل أنك كنتي مندفعه من البداية وأعتبرتي بعض الاشخاص أصدقاء والصداقة كلمة ليست سهله فهم أشخاص عاديين بالنسبة لكي جمعكم مكان واحد يعني مجرد زماله قد تربط المصالح بين الزملاء وبزوال تلك المصالح أو إنتهاء الزماله يذهب كلاً منهم عن الاخر , المشكلة أنك أعطيتي مشاعرك لهم قبل أن تتأكدي أنهم يستحقونها وأنتظرتي المقابل الذي لم يأتي وهذا ما أحزنك ولكن الحياة مليئة بأشخاص يقدرون الصداقه ويعرفون معانيها وعليكي ألا تتسرعي في إعتبار أحدهم صديق حقيقي إلا بعد التأكد من ذلك وحينها يكون العطاء المتبادل بين الأصدقاء , وأعلمي أن هذا الموقف سيفيدك كثيراً في الحياة وهو خبره حياتيه لكي وأعلمي أيضاً أن الحياة هكذا تحتوي علي كل أشكال البشر فتعلمي كيف تتعاملي مع كل شكل منهم.

أما بالنسبة لمن طلب منكي الاستفسار منهم عن أسباب البعد والتجاهل ورفضتي لانك لا تحبي التطفل ,ولي ملحوظة هنا فمن الممكن أن يكون هناك سبب لهذا البعد ناتج عن سوء فهم منهم ويكون البعد رد فعل لموقف معين قد يزول إذا عرفتيه وقمتي بتوضيحه فممكن أن تسألي عن السبب وبدون تطفل أو إلحاح إلا إذا كنتي متأكده إنه لا يوجد شيء فإن كانت الاجابه إنه لا يوجد سبب منطقي لهذا الجفاء فحينها تنسحبي بضمير مرتاح وسعاده لتخلصك من زيف بعض الأشخاص .

Heba Gamal Emara يقول...

ا. هيثم
اهلا وسهلا بك كعضو جديد مدونتى المتواضعة
كلامك انزل على صدرى البرد والثلج واراحنى كثيرا من ضغوط كنت احملها فوق رأسى
جزاك الله كل الخير واعانك على تحقيق ما تصبو اليه

حلم بيعافر يقول...

البعيد عن العين بعيد عن القلب
مثل غلللللللللللللللللللللللط جدا
اللى فى القلب فى القلب مهما كانت المسافات بعيدة
تحياتى

Heba Gamal Emara يقول...

مايمكن هما فهموه من الناحيه دى بس

واحده من الناس يقول...

حبيبتى هبه
اتذكر الان تلك الساعات القليله التى قضيتها معك كم تمنيت لحظتها لو كانت ايامنا طويله معا
تمنيت لو كنت من نفس بلك حتى يمكننى ان اسير معك لساعات ولا تفرقنا الايام او السفر
اذكر سيرنا لساعات دون ان نعرف الى اين نذهب
واذكر الايس كريم وضحكاتنا وجلستنا عند الحديقه التى لا نعرف لها اسما
صديقتى
هل تصدقيننى لو اقسمت لك انك الشخص الوحيد الذى ندمت على مفارقته؟
وانك الفتاه الوحيده التى تمنيت لو بقيتى صديقتى؟
انتى اغلى من ان تقدمى نفسك صديقة لهم
هم لا يستحقون صديقه بقيمتك فلا تتتنازلى عن كرامتك ابدا
وابقى بمفردك خيرا من ان تبقى معهم وهم لا يعرفون قيمتك

Heba Gamal Emara يقول...

حبيبتى نورة:
اه
كم احتاج اليك الآن يا صديقتى
الآن وفى هذه اللحظه
قدرت بعد المسافات اللعينه التى تمنعنى من اللجوء اليكى وجلوسى معك وبقربك

جمعنا الله دائما ف الحب والمودة والخيرات

ponpona يقول...

مش ناويه تحطي بوست جديد بقي
العيد جه

:(

Heba Gamal Emara يقول...

وانت مش ناويه تردى على الكومنت اللى سبتهوللك عندك والبوست اللى هنا وتقوليلى رايك ...
:)

ponpona يقول...

انا رديت ع الكومنت .. اما بالنسبه بقي للبوست دا فانتي عارفه رأيي يا هبه انا قولتلك اللي ما يرحبش بيكي بيقي خلاص وهو الخسران بالنسبه بقي لكل اللي انتي عملتيه معاهم وهما ماقدروهوش فاماتتضايقيش انتي عملتي الصح و اللي يرضي ضميرك كون انهم ماقدروش بقي تقي دي غلطتهم مش غلطتك

الحاجه الأخيره اللي انا عايزه اقولها .. هو انك علي قد ماتجرحتي من الموقف دا علي قد ما هاتتعلمي منه

جمال عمارة يقول...

شوفي يا بنتي..

أنا كنت ها أقولك الخلاصة, لكن لقيت فريد الأطرش قالها قبل مني، وإنتي عارفة اهتمامي بالحقوق الفكرية :)

الخلاصة يا بنتي هي..

إن حبيتني أحبك أكتر، وإن ملتني راح أنسى هواك..

كل ما تتغير ها أتغير وهاكون دايماً كده واياك..

خليكي دايماً فاكرة الأغنية دي.. اللي يهتم بيكي اهتمي بيه، واللي ... إنتي عارفة الباقي

بس خلاص..
:)

Heba Gamal Emara يقول...

جمال عمارة
استمعت الى نصائحك قبل ذلك ولكم افادتنى كثيرا
واستمعت ايضا الى اراء زوار مدونتى واعتقد ان تطبيقها سيكون صعبا
فكم من ايام قضيناهنا وعشناها سويا فى الحلوة والمرة

هطبق كلام فريد خصوصا انى بحبه جدا جدا

وطبعا اهتمام حضرتك بالحقوق الفكريه باين جدا جدا :):):)

بس والله مكانش فى حاجه لام كلثوم :):)
حلوة بس خلاص دى ......

MOHAMMED ELBANNA يقول...

هبه
مدونتك جميله واحساسك عالي في البوست ده . ربنا يصلح لك حالك .
تقبلي مروري
محمد البنا
طريق النجاح
ـــــــــــــــــــ
اتمنى تشرفيني بالزياره على طريق النجاح
http://tareekelnagah.blogspot.com/

Heba Gamal Emara يقول...

آمين ا. محمد
مقبول مرورك فحضرتك نورتنى فى اولى زياراتك لمدونتى
وحضرتك والله اللى شرفتنى بجد
ان شاء الله هكون من المتابعين لمدونتك على ان تكون حضرتك ايضا كذلك وتقبل احترامى ،،،،

Timo.. يقول...

Don't cry for the spent milk

Timo.. يقول...

كان نفسي اقولك اكتر من كده..
بس كلامك كان كتير ومركز لدرجة اني قفلت كل صفحات النت وموش عاوز اعلق على اي حاجة لانه الكلام والوصف اللي في البوست.....بيوجع.
اتمنى انك تقعدي مع نفسك وتعيدي حساباتك لان محدش هياخد بإيد هبة.....غير هبه.

Heba Gamal Emara يقول...

timo...
مرحبا بك عضو جديد فى مدونتى
كلامك مظبوط لا يصح البكاء على اللبن المسكوب بس ماذا اذا كنت تعتبر هذا الكوب وهذا اللبن من اغلى الاشياء عندك .... وفجاه انسكب منك على الارض كما لو انه انسكب بارادته رغم انك محافظ عليه جدا جدا
ربنا يخليك والله على الكلام ده
واكيد هكلم هبه وهقعد معاها قعده طويله نوضح فيها فى حياتنا مين هى هبه ومين اللى بيحبها ولازم تقف معاه ومين اللى مش مهتم بيها ولازم تبعد عنه ...

نورت المدونة المتواضعه واتمنى ان تكون من زوار المدونة الدائمين كما سوف اكون انا فى مدونتك .... 

Timo.. يقول...

ما انا عملت زي قواعد اللعبة ما بتقول (لعبة الحياة)
وهو اني انصحك باللي انا مش باعرف اعمله...(وش مكسوووف)