25‏/02‏/2010

هو وهى

قال هو : مش عايزة منى حاجة تانية

قالت : لأ.... أه ...قول له انه وحشنى ..قول له إنى غلطانة ..قول له كمان إنى أنا ندمانة

إحكيله ..إحكيله ازاى انا مش عارفه أعيش من غيره

_وسكتت مرغمة طبقا لأوامر الدموع التى منعتها من الكلام_

قال لها _بأسف_ : حاضر ..حاضر هقول له بس متبكيش علشان خاطرى

قالت له : قول له هو ليه عمل كده ...ليه ؟؟؟

قول له

قال لها: متخافيش هقول له وأفكره

قالت له _ والدموع تغالبها مجددا _:اه فكره , فكره بكل حاجه

...

ومـــــــــــشــــــــــــــى

وارتمت هى على الكرسى المجاور وهى تبكى بشده ..حتى كادت ان تمتنع عن التنفس

وتذكرت ...كل شئ ...كل شئ

تذكرت التحاقها بوظيفتها الأولى بعد ان تخرجت من كليتها ،وتذكرت ايضا انه كان مديرها الشاب

وتذكرت أول لقاء له معها

وتذكرت ملاقاه عيونها معا

وتذكرت اثنائه على أى عمل تقوم به

كما تذكرت أيضا عندما فاتحها فى الموضوع

وتذكرت يوم زفافهما

و....و....و......

ولكن ..

كيف تقنع نفسها انه تذكرت انها لم تنس ابدا أى شئ يتعلق به

انها مازالت تحبه

نعم

تحبه

ولكن لماذا فعلت كل هذا ؟؟؟؟

من أجل الوظيفة

من اجل توفير مستوى معيشة أفضل

كل هذه الأسباب واهيه غير مقنعه على ما فعلته

ها هى تتذكر حوارهما

هو : انتى مش هتسيبى الشغل بقى

.. هى : ليه ؟؟

هو: ليه إيه انتى مواعدانى إن شهرك التالت مش هيعدى عليكى وانتى فى الشغل وانك هتبطلى شغل وهتتفرغى للبيبى اللى جاى

هى : بس انا مش هقدر أسيب الشغل ...الشغل ده بقى هو حياتى

هو : وانا ...وابنك اللى جاى ....ملناش اى اعتبار عندك ...؟؟؟

هى : انت مكبر الموضوع كده ليه ..كل الحكاية انى مكنتش متوقعة التقدم اللى حققته فى

الشغل وانا دلوقتى على وشك ترقيه مهمه مش عايزة أضيعها منى ..

هو : يعنى تضيعى الترقية ولا تضيعينى انا ..؟

هى : امتنعت عن الإجابة

هو : ردى عليا

هى : سؤالك ملوش إجابه عندى ..كل اللى أقدر أقوله لك ...انى مش هقدر استغنى عن شغلى

هو _بكبرياء_: صح كده ...متستغنيش عن شغلك بس استغنى عنى

وقام تاركا لها المنزل

ولم تلاحقه

وها هى تتذكر الآن

يا الله

كيف كنت بهذا الجفاء معه ،،كيف كنت معه بهذا الجحود ،،ولماذا نسيت فى لحظة حكاياته معى،،ولماذا فى لحظة أخرى ..استغنيت عن كل شئ لماذا ؟؟؟؟

يا الله كم اتمنى ان يستمع الى كلام أخى ...وأن يتذكر كل عهودنا

.. فى ناحيه أخرى

هو : وبعدين معاك بقى ؟؟؟ مش تبطل دماغك الناشفة دى

الزوج: انا دماغى مش ناشفه ..امبارح بس اكتشفت انا وسميرة ان كل واحد فينا عايش وماسك للتانى

سكينة ورا ظهره

هو : سكينة ايه بس يا عم الحاج

، انت مكبر الموضوع اوى يا عادل

عادل : لا يا أيمن انا مش مكبر حاجه ، _بأسف_ هى اللى نست كل حاجه

أيمن : طب إيه رأيك انها قالت لى انها مستعدة تسيب الشغل وانها مستعده ترجعلك تانى

عادل: بلهفة انطفأت سريعا : يااااه مش بالبساطة دى

أيمن : لا صدقنى بالبساطة دى ..يا عادل سميرة بتحبك والله

وانت عارف بس الحمل وكده وهى اكيد كانت ظروفها او حالتها النفسيه مش مساعداها

عادل: انا مش هقدر

وســــــــــــــــــــكـــــــــــوت

وتمر الأيام ، وتمضى الأسابيع ولا يتغير شيئا

وتحاول بينهما الأطراف بالصلح ولكن

... أيمن : ألو أيوه يا عادل إزيك

عادل: أهلا يا ايمن الله يسلمك

أيمن : سيب اللى فى إيديك وتعالى حالا المستشفى

عادل : ليه حصل لك حاجه؟؟؟

أيمن : لا يا بنى آدم مش أنا ،، دى سميرة

سميرة بتولد يا بنى آدم

عادل: والنبى صحيح

أيمن أومال ههزر معاك يعنى

فــــــى المســــتــــــشــــفى

سميرة: عادل ...فين عادل ...قول له ييجى

أيمن : حاضر حاضر انا كلمته وهو جاى فى السكة

سميرة: آآآآآآآآآآآآآآآآآآآآآآه

بعد الولادة

سميرة : فين إبنى؟؟

الممرضة : مبروووك يا مدام ... دى بنت مش ولد

سميرة : بنت أو ولد أنا عايزة أشوفها

وفوجئت بأن عادل هو من يقدم لها بنتها

هى : عادل ...انت هنا بجد ...و

.. هو:_وضع يده على شفتيها_ : هسسسسس متتكلميش علشان صحتك ، شوفتى بنتنا حلوة إزاى ؟؟؟

هى: ربنا يخليك ليا وميحرمنيش منك أبدا ، انت عندك حق انت وبنتى عندى اهم مليون مرة من أى وظيفه وأى ترقيه

هو: ملوش لزوم بقى الكلام ده ،،المهم انك تقومى لنا بالسلامة

هى _بنظرة حب و امتنان_: ربنا ما يحرمنى منك ابدا

أيمن: الزوجين الحلوين ياخدوا صوره مع البنوتة

..

هناك 32 تعليقًا:

مي يقول...

الله جميلة القصة اوى
البيبى لما جه نساهم كل حاجة اصل الحب بينهم مهما كانت ظروف الحياة
تسلم ايديكى

Heba Gamal Emara يقول...

مى : انتى مش متصورة انا مبسوطة ازاى انك جيتى عندى هنا المدونة
حقيقى انا مبسوطة بوجودك هنا :)

ومبسوطة اكتر انها عجبتك :)

علياء يقول...

الله الله.. ايه يا عم الكتابات الجميلة دي :)

ده احنا بقينا جامدين قوي ..

بجد يا هبة جميلة جداً والله ونهايتها حلوة قوي..

الله ينوّر :)

Heba Gamal Emara يقول...

عليا

باشااااااااااا

ازيك يا عليا عامله ايه ؟؟؟ يا رب تكونى بخير وكويسه يا رب

بجد والله يا عليا عجبتك
احمدك يا رب :):):):)

حقيقى انا مبسوطة بيكى اوى هنا وبكل زوار المدونة :):):):)

miroooo يقول...

السلام عليكم
القصه جميله جدا يا هبه بجد احيكى عليها
بس انا رايى ان ممكن الست تجمع بين الشغل والبيت واكيد طالما الحب موجود هتبقى الحياه جميله بشغل او من غيره بس هى ظروف الحياه صعبه جدا ولازم المشاركه بين الطرفين
نورتينى فى مدونتى المتواضعه
اتمنى نكون اصدقاء
تحياتى

Heba Gamal Emara يقول...

ميرووووووووووووووووو
هييييييييييييييييه
انا مبسوطة جدا انك لبيتى دعوتى وجيتى هنا عندى وانا عايزاكى تيجى هنا على طول

المهم
مش كل الستات بتقدر توازن بين بيتها و جوزها و اولادها فى ناحيه وبين الشغل فى الناحيه التانيه
لان لازم كفه فيهم تتقل عن التانيه

وبعدين لازم يكون فى تضحيه لان برضه مش معقول كل الحب ده يكون موجود وهى تضحى بيه علشان خاطر الشغل مش كده ولا ايه ؟؟؟؟؟؟؟؟؟؟


منوراااااانى بجد ويا ريت تبقى تيجى على طول

داليا يقول...

السلام عليكم
هبه ايه الجمال ده
ايه ده قصه تجنن
يامبدعه انتى ايه الحلاوه دى ياهوبه ياقمرايه
هبه اعرفى كويس ان الحب بيصنع المعجزات
عارفه ياهبه انا لو معايا الحب ده الا سميره فيه
انا اسيب الشغل واسيب العالم كله وافضل معاه
بحيكى على القصه دى يسلم احساسك قصه فوق الرائع
نلقى دائما على حب

داليا يقول...

السلام عليكم
ازيك ياحلا هبه
مش عارفه ليه الكومنت بتاعى الا كتبته لكى من قبل كده مش ظهر
المهم عايزه اقولك الله عليكى وعلى احساسك
القصه فوق الرائع
واعرفى ياهوبه ان الحب بيصنع المعجزات
يعنى ممكن تتخلى عن كل شيئ عشان خاطر عيون الا بتحبيه
انا لو لقيت حب زى ما سميره لاقت كده
انا اسيب الشغل واسيب الدنيا واقعد جنبه
بالنسبه للقصه بقه
هو فى نوع من الانانيه شويه من عادل
هى بردو الست ممكن توفق بين شغلها وبيتها
اغلب سيدات الاعمال الناجحين زوجات وامهات ومع ذلك ناجحين بكل شيئ
تحياتى ونلقى دائما على حب

الشاعر الفنان أحمد فتحى فؤاد يقول...

أولا حمدالله على السلامة .. طال غيابك
ثانيا الظاهر إنى كنت أنا كمان نايم نوم طويل .... سامحينى على التأخير
ثالثا:إنتى جميلة و كتاباتك دائما جميلة زيك
نورتى مدونتك
دمتى بخير

Heba Gamal Emara يقول...

داليا :
فى البدايه طبعا انا عايزة ارحب بيكى نرحيب كبيييييييييييير اوى اوى آد كدهو

تصفيق حاااااااااااااااد

طبعا ميرسى جدا جدا لذوقك وعلى انك لبيتى ليا دعوتى وجيتى عندى هنا المدونة
وبجد بجد المدونة منوره بيكى جدا جدا جدا

ومبسوطة اكتر بالكومنت ده
وبتحليلك الجميل وبرأيك الصائب كمان

وبعتذر لك عن تأخير نشر التعليق


منورااااانى :):):):):)

Heba Gamal Emara يقول...

الشاعر الفنان أحمد فتحى فؤاد :

أولا : اهلا وسهلا بيك بعد غياب طوييييييييل

ثانيا : فعلا حضرتك إتأخرت بس مفيش مشكله يا فندم حضرتك تنور فى اى وقت :)

ثالثا : ده إطراء كبير عليا أوى يا فندم وأنا مستحقهوش
والمدونة منوره بزوارها

:):):):):):)

عاشقة الحب يقول...

اول جزء غاية في الروعة

بالنسبة للفكرة مش لازم الشغل هو اللي يخلي المراة تقصر في دورها
يعني مش لازم نحكم ( بفكرة مسبقة )
ان ده يمنعها من تادية واجبها نحو بيتها
لكن من دون تسرع نبص للامور من كل الجوانب و نحاول نوصل لحل من دون ما نحكم عل المراءة انها مش هتوفق
و من غير ما هي تحكم ان تركها للعمل هيقيدها

و عموما ليس قانوننا انما لكل موقف ظروفه الخاصة

شكرا لترك مساحة لتعليقي المتواضع

تحياتي

داليا يقول...

ميرسى ياهبه على زوئك العالى ده
بس بجد هى قصه فعلا تجنن
والا يجنن اكتر الا كتبت القصه الجميله دى هبه
واحنا مافيش بنا اعتذرات ياقمرايه
تحياتى الكبيره

أميرة الأحلام يقول...

بجد قصه جميله اوووى وفيها معانى كتير
دايما ما بنحسش بقيمه الا في ايدينا الا لما يضيع منا ونرجع نبكى عليه
بس المهم اننا نصلح غلطنا وما نديش للعند الفرصه انه يبوظ حياتنا ويضيع حاجات كتير جدااا ممكن نندم عليها بعد فوات الاوان
بجد تسلم ايدك ياقمر
وانا سعيده جدااا انى اتشرفت بزياره مدونتك
وبتمنى نتابع بعض على طول
تحياتى ليكى ياجميله

طالبة مقهورة ..درجة أولى يقول...

هالللللللو

:)

كنت هعيط ف النص الاول..وبعدين اتصدمت من النهاية

اصل نص المدونين او كلهم بمعنى اخر بيحبوا يكتبوا نهايات تعيسة

وانا من هؤلاء لأكون واقعية مش بؤمن بالنهايات السعيدة

بس تعرفي انها فعلا حاجة محيرة اني مثلا لو اتخيرت بين شغلي وبين بيتي

هوا اكيد البيت المهمة الاولى بس انا بالنسبالي الشغل يمكن بشوفه اهم

وعارفة اني غلط ^_^ بس هوا كده

تسلم ايدك يا هوب يا عسلية :)

Timo.. يقول...

هو...اتعرف عليها في الشغل..يعني مش ضد مبدأ الشغل..
هو..بيخاف عليها وبيحبها..
هو نفسة تكون الحياة المشتركة بينهم ان تكون هي البيت والاسرة والكيان..
هي..لو فهمت كل ده مش ها يبقى البوست اسمه (هو وهي) :)

علياء يقول...

ازيك يا جميل.. أنا بعدي كتير بس قلت لازم أسلم بقى المرة دي حتى لو ما فيش جديد..

ازيك يا هبة ؟ تمام؟ يارب دايماً تكوني تمام :)
سلام بقى :)

Heba Gamal Emara يقول...

عاشقه الحب :
اهلا وسهلا بيكى هنا فى اول زياره فى مدونتى ، ويا رب مش تكون الاخيرة
وميرسى جدا جدا لرأيك الجميل وتعليقك الاجمل
هستناكى ابقى تعالى هنا كتير

Heba Gamal Emara يقول...

داليا : والله انتى اللى زى العسل :):)

Heba Gamal Emara يقول...

داليا : والله انتى اللى زى العسل :):)

Heba Gamal Emara يقول...

أميرة الأحلام :

اهلا وسهلا بيكى فى اول زياره ليكى هنا عندى فى مدونتى

رأيك مظبوووط فعلا بس أكيد فى ناس بتشوف الموضوع من وجهه نظر تانيه

منورانى هنا فعلا وياريت نتابع مع بعض على طول انا اجيلك وانتى تجيلى :)

Heba Gamal Emara يقول...

طالبه مقهورة : سلامتك من العياط
لا ومتتصدميش

معلش

لا انتى مش غلط
ما هو لولا اختلاف الأراء لبارت السلع ولا ايه ؟؟؟؟


منورانى فى اول زياره ليكى هنا فى المدونة وهستناكى تيجى ومتتاخريش عليا

Heba Gamal Emara يقول...

تيمو:
بصراحه انت حللت العنوان بالظبط زى ما انا كنت عايزاه
بالظبط بالظبط بالظبط يعنى

اكرمك الله
ميرسى لمرورك ووتعليقك

Heba Gamal Emara يقول...

عليا : انا زى الفل
مبسوطة لسؤالك يا جميل

gmr14 يقول...

مرحبا..
قصة معبرة..
تقبلي مروري..

miroooo يقول...

السلام عليكم
انتى فين يا هبه؟ فين بوستاتك الجديده
بقالك كتير غايبه عن الساحه
يارب تكونى بخير
منتظره كل جديد
دمتى بكل الخير

Heba Gamal Emara يقول...

إزيك يا ميرووووو
كتتخيليش انا مبسوطة اد ايه ؟؟؟ لاننك سألتى عليا


انا كويسه الحمد لله

بس شويه مشاغل كده

Heba Gamal Emara يقول...

اهلا قمر
مقبول مرورك
ميرسى جدا لذوقك وان شاء الله تبقى من زوار المدونة الدائمين

ف انتظار تعليقك القادم

medodido_2010 يقول...

خير كلام اللى يبدأ بسلام

السلام عليكم و رحمة الله و بركاته

مساء الورد غلى عيونك يا هبه

ما شاء الله عليكى و يا رب دايما عقلك و قلبك حاضرين علشان ينسجوا و يخرجوا لنا القصص الجميلة دى

و أنا دايما مؤمن بأن وراء كل رجل عظيم امرأة هى أعظم منه

و لا حياة بلا حب و الحب هنا هو سيد الموقف

بارك الله فيكى و اعذرينى لأن عملى ما يمكنى من المتابعة المستمرة

Heba Gamal Emara يقول...

medodido_2010


اهلا وسهلا فيك باول تعليق واول زيارة

مقبول مرورك وان شاء الله مش تكون اخر زيارة

كلامك مظبوط

ولا داعى للاعتذار فقط تذكر المدونة ف وقت فراغك :)

شكرا ليك جدا جدا

sosi essam يقول...

جميـــــــــــــــلة دي كلمة قليلة جدا بجد بجد تسلم إيدك أول مرة أزورك و مأظنش إنها هتكون آخر مرة :):)

Heba Gamal Emara يقول...

طبعاً طبعاً اهلاً وسهلاً بيك ف كل وقت .. ومتشكرة ليكى جداً

واتمنى منك الانضمام للبيدج بتاعتى

والليبل بتاعها هنا من برا :)

عاوزة رأيك بقى ف كل حاجة ومتشكرة جداً على رأيك ف باقى المقالات :)