31‏/08‏/2009

البطيخ

طبعا مفيش حد مننا مش بيحب فاكهة البطيخ
وانا بحبها ..طيب وربنا بحبها
هذه الفاكهة ذات اللون الوردى بها من الفوائد الكثير والكثير والكثير ..
المهم بعد ما بحثت وفحصت ومحصت وجدت من الفوائد التالى :
البطيخ فاكهة مليئة بالماء وهو ما يروى عطش الصائم فى عز الحر
البطيخ مع الجبن الابيض فى السحور يساعد على التغلب على مشقة الصيام
يحتوى البطيخ على مادة الليكوبين وهى مادة مضادة للاكسدة توجد فى الفواكة الحمراء وخاصة البطيخ وكلما زادت هذه المادة فى البطيخ كلما كان لونة اكثر احمرارا
هذه المادة تساعد فى علاج الامراض المزمنة مثل :اورام البروستاتا عند الرجال وسرطان عنق الرحم عند السيدات
كما يقوم علماء الدول المتقدمة بالتالى :*الهند :تقوم بتمليح قشر البطيخ
الصين :تقوم باستخام قشر البطيخ بعد تجفيفه فى علاج امراض الكلى المزمنة وضغط الدم المرتفع
كما ينصح الاطباء لمرضى القلب بكثرة اكل البطيخ .
متهيألى هناكل البطيخ كل يوم :)

هناك 19 تعليقًا:

ضياء فارس يقول...

ما شاء الله ,,, كل هذه الفوائد في البطيخ ,,, سبحان الله
ربنا من رحمته جعل هذه الفوائد في البطيخ والمعروف ان كل الناس بتحب أكل البطيخ فلم أرى شخص في حياتي لا يحب أكل البطيخ وحتى انه سعره منخفض وفي منتاول الجميع,,,

جزاكِ الله كل خير أخت هبه على هذا المقال المفيد و في انتظار جديدك اختي الكريمة ,,,
ودمت بخير

Heba Gamal Emara يقول...

الشكر لك يا اخ ضياء
فانت اول تعليق فهذه التدوينة الجديدة
وفعلا عندك حق
شفت البطيخ حلو ازاى ؟؟؟؟؟؟
جزاك الله كل الخير
المدونة نورت بوجودك
ودمت بود

عمرو يقول...

هبة
عاملة إيه
مقال موفق. بس فيه معلومة بسيطة أحب أضيفها. البطيخ مش فاكهة خالص. البطيخ خضار. آه والله.
بيصنف البطيخ على إنه خضار في علوم النباتات, أما الطماطم فبتصنف على إنها فاكهة.
بس الطماطم مجنونة يعني لو فكهنت مش مشكلة لكن البطيخ إيه للي خضره
حاجة عجيبة والله
:)

Heba Gamal Emara يقول...

ههههههه
والله عندك حق
دى حاجه انا نسيت اقولها فى مقالى ان البطيخ من الخضروات
بس يمكن لأن القشرة خضراء فقالوا خلاص نخليها خضار :):):)
شكرا لك لمرورك على مدونتى
ودمت بخير

واحده من الناس يقول...

ايه الروقان ده
بصى ياهبه انا لسه اللى راجعه حالا فاتاخرت ف التعليق
كنا فى عزومه فيها زفر يعنى بط ولحمه وفراخ
ههههههههههه
وطبعا مكنش ممكن ابدا اسيب العزومه دى لاى سببا كان
بس تعرفى البط كتم على نفسى
محتاجه فعلا شقة بطيخ تطرى ع القلب
متجيبى شقه من اللى ف الصوره دى
ههههههههههه

وكل الفوايد دى طلعت ف البطيخ
يا حلاوه يا ولاد
ويخلق مالا تعلمون

مقال دمه خفيف خالص
وحلو اوى حكاية ان البطيخ خضار اول مره اعرف
والطماطم فاكهه
هههههههههه
سبحان الله
حلو اوى المقال
هستنى اللى جاى
:)

Heba Gamal Emara يقول...

اهلا اهلا اهلا
نورتى المدونة يا عسولة :)
والف هنا وشفا عليكى البط والزفر
ومطرح ما يسرى يمرى :)
وفعلا سبحان الله كل الفوائد دى فى البطيخ والواحد مش يعرف :)
وانا هستنى تعليقك :)

Heba Taher يقول...

على فكرة.. الأكلة المفضلة عندي هي
الجبنة القديمة والبطيخ السائع
بحبها جدا آآآآخر حاااجة
لدرجة أني ممكن أكلها كل يوم
البطيخ كمان من الأطعمة التي تساعد على تحسين عملية الهضم
كما أن بها سعرات حرارية أقل من أنواع أخرى من الفواكه
وهذا ما تعلمته في كتب ترجمتها لديكم بالطبع
هههههههههههههههه

Heba Gamal Emara يقول...

طيب كويس ان البطيخ من اكلتك المفضله
وكويس كمان ان ترجمة كتبنا بها ما يساعد على تحسين المستويات المعرفيه
وبالهنا والشفا
وكل ما تيجى تاكلى البطيخ ابقى افتكرينى :) :) :)

غير معرف يقول...

دا دا دا دااااااااا :)
(دي الموسيقى التصويرية بتاعة الداخلة بتاعتي يا هبة) هههههههههه..
موضوع لذيذ فعلاً ومفيد .. بس كان من الصعب إن الواحد يعلق عليه بالنهار وهو عطشان وشايف الصور دي :) :) ..
يالا ربنا يوفقك دايماً يا جميل.. وفي انتظار موضوعات أخرى..
عليــاء

Heba Gamal Emara يقول...

فعلا والله عندك حق انا نفسى وانا بكتب الموضوع كنت بتعذب ....اه والله
لانى شايفه الصور ادامى وبكتبه وانا صايمة :):):)
شكرا لمرورك :)

ponpona يقول...

سبحان الله ، يبدو أنه أنا الكائن الغرائبي
الوحيد الذي لا يحب البطيخ

مش معترفه بيه تبعة الخضار لأنه ببساطه
ماينفعش يتحط ع السلطه الخضرا
وكمان مش معترفه بيه تبعة الفاكهه
لأن شكله مايديش فاكهه خالص

:)

Heba Gamal Emara يقول...

مش معقول يا بنبونة تكونى مش بتحبى البطيخ
وبعدين انتى عندك حق فى عدم اعترافك بالبطيخ ضمن الخضار بس مش لانة مش بيتحط على السلطة وخلاص
لان مش كل الخضروات بتتحط على السلطة
عندك مثلا الباذنجان مش بيتحط على السلطة والكوسه مش بتتحط على السلطة
وهكذا دواليك دواليك دواليك
شكرا لمرورك يا بنبونة :):):):):):):)

Heba Gamal Emara يقول...

مش معقول يا بنبونة تكونى مش بتحبى البطيخ
وبعدين انتى عندك حق فى عدم اعترافك بالبطيخ ضمن الخضار بس مش لانة مش بيتحط على السلطة وخلاص
لان مش كل الخضروات بتتحط على السلطة
عندك مثلا الباذنجان مش بيتحط على السلطة والكوسه مش بتتحط على السلطة
وهكذا دواليك دواليك دواليك
شكرا لمرورك يا بنبونة :):):):):):):)

اشراقة فجر يقول...

eshraqtfagr.blogspot.com
وانا فى رابعة حقوق حلوان ودى مدونتى احب هناك اشوفك هستناكى

Heba Gamal Emara يقول...

اهلا بيكى اشراقة فجر
بس ممكن اعرف انتى تعرفينى منين ومين قاللك على مدونتى

Bahr يقول...

السلام عليكم

الف مبروك يا اخت هبه على المدونه الشيك والطله المبهجه فيها
عرفنادلوقت انتى ليه اتأخرتى فى عرضها من الواضح انها اخدت منك مجهود ويارب بالتوفيق دايما

وطبعا مقدرش اسكت وفى حاجه فى الزراعه بتتقال
سبب تقسيم البطيخ ضمن الخضروات هو انه فى تعريف الخضروات ان كل نبات عشبى يطلق عليه خضروات بمعنى ان يكون للنبات ساق غضه ولكن فى حالة الفاكهه تعرف بانه كل نبات شجرى هو فاكهه( يعنى كل شجره فاكهه) ومن هنا اتى تصنيف البطيخ والشمام ضمن الخضروات

وبالنسبه للطماطم فهناك مفهوم خاطئ على انها من الفاكهه والسبب فى ذلك هو الخطأ فى بعض الترجمات حيث تترجم كلمة fruit بمعنى الفاكهه والثمره فتكتب tomato fruit فتترجم على انها فاكهة الطماطم ولكن المقصود بها هو ثمرة الطماطم وايضا بعض الدول تعتبر الطماطم من الفاكهه كفرنسا مثلا

بحر

Heba Gamal Emara يقول...

اهلا وسهلا استاذ بحر
المدونة نورت بزيارتك
وانا فعلا تعبت جدا فى المدونة ولكن دخول حضرتك وباقى زوار المدونة بينسينى تعبى فيها
وشكرا لك كثيرا على المعلومات الجميلة اللى حضرتك افدتنا بها
نورت المدونة
دمت بود
:)

جمال عمارة يقول...

الأستاذة هبة..

نشكرك على هذه المعلومات القيمة عن البطيخ.. ونشكر الأخ عمرو والأخ بحر على أنهم أوضحوا لنا تصنيف البطيخ..

المدونةشكلها حلو وبناتي خالص..

مع تحياتي،،

Heba Gamal Emara يقول...

اهلا اهلا يا بابى
مش معقولة انا كده ممكن يجيلى حاجه
ربنا يخليك ليا
ودى مجرد نقطة من بحر علمكم
دمت بحب